ولسمشر ټینګار کړی؛ افغان جګړه هېڅ وخت خصوصي سکتور ته نه سپارل کېږي

افغان ولسمشر اشرف غني پرون یو ځل بیا ټینګار کړی چې د افغانستان جګړه په هېڅ صورت نه خصوصي کېږي. هغه دا خبره پرون ماښام په هلمند کې د ۲۱۵ میوند قول اردو پوځیانو ته په وینا کې کړې ده. ارګ په یوه خبرپاڼه کې ویلي، ولسمشر غني افغان پوځيانو ته په اشارې ویلي چې د افغان پیاوړي پوځ په موجودیت کې به هېڅ وخت افغان جګړه خصوصي سکتور ته و نه سپارل شي. په خبرپاڼه کې دا هم راغلي چې ولسمشر ویلي، د جګړې د لومړۍ کرښې پوځیانو ته باید ځانګړي امتیازات په پام کې ونیول شي. ولسمشر پرون شپه له هلمند بېرته کابل ته راستون شوی دی. خبرپاڼه وايي چې ولسمشر به د هلمند د خلکو ډېری ستونزو ته حللارې ولټوي او ددوی د امنیت لپاره به نوي تدابیر ونیسي.