د متحده ایالتونو ولسمشر ډونالډ ټرمپ جاپان ته د سفر پر مهال ویلي، واشنګټن د ایران د اوسني رژیم د بدلون په لټه کې نه دی، بلکې غواړي چې دغه هېواد له اټومي وسلو راوګرځوي.
د ټرمپ دغه څرګندونې داسې مهال دي چې له دې وړاندې یې د ملي امنیت سلاکار جان بولټن ویلي وو، چې د ایران اوسنی رژیم باید بدل شي.
ټرمپ د جاپان له لومړي وزیر سره په ګډه خبري ناسته کې ویلي: « ایران دا فرصت لري چې د اوسنۍ رهبرۍ په مشرۍ په یوه عالي هېواد بدل شي، موږ د دغه هېواد د رژیم د بدلون غوښتونکي نه یو، بلکې غواړو چې دغه هېواد له اټومي وسلو را وګرځوو».
نوموړي زیاته کړې چې ایران اوسمهال دا لېوالتیا لري، چې له واشنګټن سره یوې هوکړې ته ورسېږي او که ایران وغواړي، دوی تیار دي چې اوسنۍ لانجې د خبرو له لارې حل کړي.
ټرمپ دغه راز زیاته کړې: « کله چې زه واک ته ورسېدم، ایران یو وحشت و. هغوی نږدې په ټول منځني ختیځ کې جګړه پیل کړې وه. دغه هېواد په سوریه او یمن کې د هر لوی برید تر شا لاس درلود. خو هغوی اوسمهال بېرته شاتګ ته اړ شوي، ځکه چې دوی په اقتصادي لحاظ له ډېرو ستونزو سره مخ دي».
دا په داسې حال کې ده چې تر دې وړاندې کویټي چارواکو د ایران او امریکا ترمنځ د خبرو د پیل راپور ورکړی و، خو ایران بیا دغه ادعا رد کړې ده.
