د ماشومانو د نړیوالې ورځې په مناسبت، د اکسوس کتاب پلورنځي له لوري د میدان وردګو ولایت د سیدآباد ولسوالۍ د سلطان محمود غزنوي منځني ښوونځي سلګونو زدهکوونکو ته د «غوټۍ کوچنی ټولګی» لړۍ نوی چاپ شوی کتاب «د جراثیمو عجیبه دنیا» او قرطاسیه ووېشل شوه.
یاد کتاب د غوټۍ له خوا د افغان ماشومانو د عامه پوهاوي او علمي پوهې د لوړولو په موخه خپور شوی، چې په کې د جراثیمو، روغتیا او حفظالصحې اړوند معلومات په ساده او ماشومانو ته د فهم وړ ژبه وړاندې شوي دي.
د اکسوس کتاب پلورنځي مسوولین وایي، د دې پروګرام موخه د لرې پرتو او محرومو سیمو د زدهکوونکو ملاتړ، د مطالعې دود پیاوړتیا او د ماشومانو هڅول دي، څو د کتاب له لارې خپلې پوهې او مهارتونو ته وده ورکړي.
د ښوونځي مسوولینو او ښوونکو دغه اقدام د کلیوالو زدهکوونکو لپاره ګټور وباله او ویې ویل، چې دا ډول فرهنګي او تعلیمي پروګرامونه د ماشومانو د فکري ودې، د مطالعې د فرهنګ د پراختیا او له نوو معلوماتو سره د هغوی د بلدتیا لپاره مهم رول لري.
زدهکوونکو هم د یادو کتابونو له ترلاسه کولو خوښي څرګنده کړه او زیاته یې کړه، چې د دغو کتابونو له لوستلو سره به د روغتیا، حفظالصحې او نورو علمي موضوعاتو په اړه نوي معلومات ترلاسه کړي او د مطالعې شوق به یې لا زیات شي.
ددغه ښوونځي ښوونکو وویل، چې د ماشومانو د نړیوالې ورځې په مناسبت دا ډول نوښتونه نه یوازې د زدهکړو او مطالعې د پیاوړتیا لامل کېږي، بلکې په لرې پرتو سیمو کې د ماشومانو د علمي او فکري ودې لپاره هم اغېزناک تمامېږي. د دوی په وینا، کتاب او زدهکړه د ماشومانو د روښانه راتلونکي او د ټولنې د پرمختګ بنسټ جوړوي.
