داسې ویل کېږي چې د ولسي جرګې په ټاکنو کې تر ډېره اوسني وکیلان بریالي شوي دي. د ولسي جرګې په نننۍ غونډه کې ډېری برحالو وکیلانو ځانونه په ټاکنو کې بریالي ګڼل او د ټاکنو له پایلو راضي وو. د نننۍ غونډې په امتیازي ساعت کې د ولسي جرګې لوړه سلنه غړو وویل، چې په ټاکنیزو منډو ترړو کې یې هڅو ښه پایله لرلې ده او دوی بریالي دي. ددوی څرګندونو ته په اشارې داسې اټکل کېږي چې په راتلونکې ولسي جرګه کې به هم نوې څېرې ډېرې کمې وي او تر ډېره به پخواني استازي رابریالي شوي وي. وکیلانو همدا راز ویلي که د ټاکنو خپلواک کمیسیون د ټاکنو پایلې اعلانوي نو ټول اړخونه دې دغه پایلې ومني او په هېواد کې دې بې ځایه مخالفتونو او لاریونو ته زمینه نه برابروي. خلک تر ډېره هیله من دي چې په نوې ولسي جرګه کې به وړ او نوي اشخاص ددوی په رایو دنده پیلوي خو دا باور هم شته چې تر ډېره به د خلکو دغه هیله پوره نه شي. د ټاکنو کمیسیون بیا وايي چې دوی په ټاکنو کې پوره شفافیت تضمینوي او چا ته به اجازه ور نه کړي چې په پایلو کې لاسوهنه وکړي.
