د ولسي جرګې د نړیوالو اړیکو کمېسیون وايي، پاکستان باید ملا برادر افغان حکومت ته وسپاري.
دغه کمېسیون زیاتوي، که پاکستان غواړي په افغانستان کې د سولې له ټینګښت سره رښتینې همکاري وکړي، نو د ملا عبدالغني برادر په ګډون دې ټول هغه طالب مشران چې د پاکستان په زندانونو کې دي، افغان حکومت ته وسپاري.
د دغه کمېسیون ريیس زمرک پادخوابي وايي، افغان حکومت هم باید په جدي ډول له پاکستانه وغواړي چې ملا برادر دوی ته وسپاري.
پادخوابي ازادي راډيو ته ويلي: «افغان حکومت باید دا غوښتنه وکړي چې نوموړی باید افغان حکومت ته تسلیم کړي او حکومت باید دا غوښتنه حتمي او ضروري وکړي. که پاکستان دا وکړي موږ يې هرکلی کوو او هیله لرو چې پاکستان له خپل پخواني سیاسته نور لاس په سر شي او د افغان سولې په برخه کې رښتیني ګامونه واخلي.»
پادخوابي وايي، پاکستان هېڅکله د افغان سولې په بهیر کې رښتینې همکاري نه ده کړې او دی ډاډه نه دی چې پاکستان به ملا عبدالغني برادر افغان حکومت ته وسپاري.
بل خوا د سولې عالي شورا يوه غړي قاضي محمد امین وقاد ازادي راډیو ته ویلي چې د طالبانو د لوړپوړي قوماندان ملا برادر سوابقو ته په کتو، هیله شته چې د نوموړي خوشې کېدل به د سولې پروسې په برخه کې ګټور تمام شي.
د افغانستان د سولې او جګړې د انسټېټيوټ ريیس حکمت الله اعظمي که څه هم د ملا برادر خوشې کېدل يو ښه ګام ګڼي، خو په خبره یې افغان حکومت ته د ملا برادر سپارل د ګټې پرځای تاوان کوي.
نوموړي ویلي: «که دی له افغان دولت سره يوځای شي او يا کابل ته راشي، د ده له نفوذ سره کومک نه کوي، ځکه خلک بیا وايي چې نوموړی په کابل کې ناست دی، نو طالبان به پر ده باندې څه باور وکړي او رول به یې څه وي، زه فکر کوم که دی له پاکستان او افغانستان نه لرې او له طالبانو سره په خوا کې وي، نو د سولې له بهیر سره تر يوې اندازې مرسته کولای شي.»
اعظمي په دې باور دی چې ښايي ملا برادر د افغانستان پرځای يو بل هېواد ته ولېږدول شي.
ملا برادر چې د طالبانو له بنسټ اېښودونکو څخه بلل کېږي، د طالبانو د واکمنۍ پرمهال د افغانستان په جنوبي برخو کې د پوځي عملیاتو مسوول و او په۲۰۱۰ میلادي کال کې د پاکستان په کراچۍ ښار کې ونیول شو.
