هند دې د افغانستان په تړاو پر خپله بهرنۍ پالیسۍ له سره غور وکړي

افغانستان کې له وروستیو سیاسي بدلونو وروسته، له هندوستان سره سیاسي او اقتصادي اړیکې تقریباً په ټپه ولاړې دي. دا حالت په داسې حال کې دی چې د دواړو هېوادونو تر منځ تېرو لسیزو کې ښې او د اعتماد وړ اړیکې موجودې وې. اوس مهال، افغان سرپرست حکومت له ټولې نړۍ، په ځانګړې توګه له ګاونډیانو او هند سره رسمي اړیکې او تعاملات رغولو ته ډیر لېوال دی.
د افغانستان او هندوستان اړیکې تل د سیمه‌ییز ثبات او پرمختګ لپاره مهمې بلل شوي دي. هندوستان د سیمې یو ځواکمن اقتصادي او سیاسي هېواد دی او له افغانستان سره ښې اړیکې د دواړو هېوادونو په ګټه دي. په تېرو دوه نیمو لسیزو کې، ګڼو افغان ځوانانو په هندوستان کې زده کړې کړې او په لکونو نور افغانان هندوستان ته د درملنې لپاره تللي دي. افغانان هندوستان د یو ښه دوست او همکار هېواد په توګه پېژني او له دې امله، د اړیکو بیا رغول او پیاوړي کول د دواړو هېوادونو لپاره ډېره مهمه موضوع ده.
د افغانستان نوی سرپرست حکومت دا هڅه کوي چې په نړیواله کچه خپل دریځ او مشروعیت ټینګ کړي. په دې برخه کې د هند ملاتړ او همکاري ډېر مهم دي. افغانان هیله لري چې هندوستان به ژر تر ژره له افغانستان سره خپلې اړیکې له سره پیل کړي او د تېر په څېر به د افغانستان له سرپرست حکومت او ملت سره ملګرتیا وکړي، ترڅو ګډې ګټې او راکړې ورکړې بیا هم دوام ومومي.
له بلې خوا، هندوستان ته په کار ده چې د افغانستان اوسني وضعیت ته په کتو، خپل دریځ روښانه کړي او له نوي سرپرست حکومت سره په ګډه کار وکړي. د افغانستان خلک او سرپرست حکومت دواړه دې ته چمتو دي چې له هند سره هر اړخیزې اړیکې ټینګې کړي. ځکه چې د افغانستان د پرمختګ او ثبات لپاره د نړیوالو همکاریو اړتیا شته او په دې لاره کې هندوستان کولای شي یو مهم رول ولوبوي.
په دې توګه، افغانان هیله لري چې هندوستان به د افغانستان په وړاندې خپلې پالیسۍ له سره وګوري او ژر تر ژره به له افغان سرپرست حکومت سره اړیکې بیا پيل کړي، ترڅو د دواړو هېوادونو تر منځ ګډې ګټې او راکړې ورکړې بیا هم فعاله شي او په دې توګه به د سیمې ثبات او پرمختګ هم تضمین کړي.
په اوس حال کې د افغانستان او هندوستان اړیکې یو ځل بیا د بیا کتنې او پیاوړتیا په مرحله کې دي. دواړه هېوادونه کولای شي له دې فرصته په ګټه اخیستنې سره د خپلو خلکو لپاره یو ښه راتلونکی رامنځته کړي. په پای کې، هندوستان ته په کار ده چې د افغانستان سره خپلې اړیکې بیا ورغوي او په ګډه د سیمې په پرمختګ کې خپل رغنده رول ولوبوي.