سږ کال  له کندهاره بهر ته د ۱۳۰ میلون ډالرو په ارزښت انځیر صادر شوي

د کندهار د سوداګرۍ خونې مسوولین وايي، په تېرو ۹ میاشتو کې یې له کندهاره بهر ته د څه باندې ۱۳۰ میلیونه ډالرو په ارزښت، ۲۳ زره او ۴۹۵ ټنه وچ انځر صادر کړي دي. دوی وايي، د دغو انځرو ډیره برخه یې هند ته صادره شوې ده. د سوداګرۍ خونې مسوولین وايي، په دې وروستیو کې په کور دننه د سوداګرۍ په برخه کې اسانتیاوې ډيرې شوي، چې ورسره بهر ته صادرات هم زیات شوي دي. د کندهار یو شمېر سوداګر او باغ لرونکي وايي، که څه هم سږ کال د وچکالۍ او مرضونو له امله د انځرو حاصلات کم وو خو، په خبره یې قیمتونه یې لوړ او بازار یې ښه و. دوی له سرپرست حکومته غوښتنه کوي، چې د سوداګرۍ برخه کې، لا زیاتې اسانتیاوې برابرې کړي څو کروندګر له خپلو حاصلاتو ښه عاید لاسته راوړي.