مولوي عبدالکبیر کابل کې د اسلامي همکاریو سازمان له سفیر سره کتلي

د کډوالو او راستنېدونکو چارو سرپرست وزیر مولوي عبدالکبیر په کابل کې د اسلامي همکاریو سازمان له سفیر محمد سعید العیاش سره کتلي دي. یاد وزارت د یوې خبرپاڼې په خپرولو سره ویلي، چې په دې کتنه کې له افغان کډوالو سره پر مرسته کولو او د یو شمېر ټولګټو پروژو په هکله خبرې وشوې. د سرچینې د مالوماتو له مخې العیاش د سرپرست حکومت له لوري د افغان کډوالو د راروانې لړۍ د ښه مدیریت ستاینه کړې او ویلي يې دي، چې د کوربه هېوادونو له لوري له کډوالو سره ناسم چلند او اجباري ایستلو يې د اسلامي همکاریو سازمان خواشینی کړی دی. هغه زیاته کړې، چې د اسلامي همکاریو سازمان له کډوالو سره د مرستو راجلبولو ته کار کوي او هیله یې څرګنده کړې، چې د یاد سازمان غړي هېوادونه د افغان کډوالو لاس نیوي ته ځانګړې پاملرنه وکړي.