ټاکنو کمیسیون: د بایومتریک وسیلو یوه بله محموله هم کابل ته رسېږي

ټاکنو کمیسیون چارواکي وایي، چې په راروانو ټاکنو کې له بایومټریک سیستم نه د ګټه اخیستنې لپاره د دوی کار دوام لري او تمه ده چې تر یوې اونۍ دا موضوع وروستۍ شي. د یاد کمیسیون ویاند او منشي سید حفیظ الله هاشمي وویل، چې نن به د بایومټریک وسیلو یوه بله محموله هم کابل ته را ورسېږي. هغه زیاته کړه، چې ددې وسیلې ۴۴۰۰ سټیوه کابل ته رسېدلي دي او ټاکل شوې سبا به هم یوه یا دوه محمولې را ورسېږي. نوموړي وویل، د بایومټریک په اړه یې چې څه ویلي وو، هغه هر څه د بشپړېدو په حال کې دي. په ټاکنو کې له بایومټریک سیسټم نه ګټه اخیستنه د حکومت د مخالف لوی ملي ایتلاف یوه بنسټیزه غوښتنه وه. هاشمي وویل، د ۳۳ ولایتونو د ټاکنو د کمیسیون ریسان نن او سبا په کابل کې په یوه روزنیز ورکشاپ کې ګډون کوي. د هېواد د ټاکنو کمیسیون د اعلان له مخې د ولسي جرګې ټاکنې به د روان کال د تلې میاشتې په ۲۸ نیټه تر سره شي.