د افغانانو د ایستلو له امله ایران کې ساختماني کارونه ټکني شوي

د تهران د پراخو تولیداتو ټولنې مشر، ایرج رهبر، وايي چې په وروستیو کې د افغان کارګرانو له وتلو سره د ساختماني صنعت چارې له ګڼو ننګونو سره مخ شوې دي، په ځانګړي ډول په پلازمېنه تهران کې. هغه په یوه تازه مرکه کې ویلي، چې په ساختماني پروژو کې تر نیمایي ډېر کارګران افغانان وو، او اوس چې هغوی له ایران څخه وتلي، ګڼې پروژې ځنډېدلي او د کار پرمختګ ورو شوی دی. رهبر زیاتوي، افغان کارګرانو د سمنټ اچولو، سنګ کارۍ، بنايي او نورو عادي کارګرۍ په شمول په بېلابېلو برخو کې کار کاوه، او اوس د دغو مسلکونو لپاره د ایراني کارګرو پیدا کول وخت غواړي.