افغان او برېتانیوي چارواکو د افغان کډوالو پر ستونزو خبرې کړې دي

د کډوالو او راستنېدونکو چارو وزارت مسوولینو او د برېتانیا د بشري مرستو رییس الیستر برنیت له ایران او پاکستان څخه د جبري راستنېدونکو افغان کډوالو د ستونزو په اړه خبرې کړې دي. په دې ناسته کې،د جبري راستنېدونکو د ځان بسیاینې او د هغوی د ستونزو د حل په موخه خبرې شوې دي. د کډوالو چارو وزارت د پلان او پالیسۍ رییس مولوي احدي ویلي، چې په هېواد کې د سولې په راتګ سره نړیوال سازمانونه د افغانانو د ملاتړ په موخه د هېواد هرې سیمې ته سفر کولی شي. دواړو لورو د جبري راستنېدونکو د ستونزو د حل لپاره پر بېلابېلو لارو چارو بحث او د همکارۍ پر دوام ټینګار کړی دی. په دې غونډه کې د راستنېدونکو د بیا مېشتېدنې، کاري فرصتونو، سرپناوو او بېړنیو مرستو په اړه خبرې شوې دي.