جلالي: هڅه کوو له داخلي بودجې روغتیايي خدمتونه پراخ کړو

د عامې روغتیا سرپرست وزیر نور جلال جلالي د افغانستان لپاره د یونېسف له استازو سره په لیدنه کې ویلي، هڅه کوي چې د نړۍوالو مرستو تر څنګ د کورنۍ بودجې په کارولو سره په هېواد کې روغتیایي خدمتونه پراخ او معیاري کړي. په یاده ناسته کې د ماشومانو لپاره د ملګرو ملتونو ادارې د افغانستان استازي تاج الدین اوېلا او د هغه همکارانو هم ګډون لاره. دواړو لورو په یاده ناسته کې روغتونونو ته د درملو رسولو، د روغتیا په برخه کې د مرستو پر مدیریت، د لګښتونو پر روڼوالي، د روغتونونو د معیاري کېدو په موخه د عصري وسایلو پر برابرېدو او یو شمېر نورو مسایلو بحثونه کړي دي. نور جلال جلالي له یاد سازمان څخه غوښتنه وکړه، چې روغتیایي مرکزونو ته باید پر وخت درمل ورسوي؛ څو د راپورته کېدونکو ستونزو مخه ونیول شي.