حنفي: د مخکنیو پوځیانو د یتیمانو پالنې ته ژمن یو

د ریاست‌الوزرا اداري مرستیال مولوي عبدالسلام حنفي د زمري ۲۴مې په مناسبت غونډه کې وویل، چې د اسلامي امارت د عفوې د فرمان له مخې د تېرې حکومت چارواکي په هېواد کې په امن او هوساینه کې ژوند کوي. نوموړي وویل، چې اسلامي امارت د تېر حکومت د چارواکو ټولو حقونو ته ژمن دی او هېچا ته اجازه نه ورکوي، چې د تېرو اختلافاتو له امله له چاسره زور زیاتی وکړي. حنفي دغه راز وویل، چې اسلامي امارت د تېر حکومت د پوځیانو د یتیمانو پالنې ته ژمن دی او د هغوی د زده‌کړو لپاره هم ځانګړي پروګرامونه په پام کې نیول شوي دي. هغه دغه راز په خپلو خبرو کې وویل، چې  په تېرو درېیو کلونو کې څه باندې درې میلیونه افغان کډوال له ګاونډیو او د سیمې او اروپایي هېوادونو څخه ایستل شوي او هېواد ته راستانه شوي دي.