سپینې ماڼۍ د کانګرېس په استازو جرګه کې د ډیموکراټانو هغه اقدام غندلی، چې ولسمشر ټرمپ ته نږدې له لسګونو کسانو او کمپنیو یې غوښتي، چې له روسیې سره د هغه د احتمالي اړیکو په اړه دوسیې ورسره شریکې کړي.
سپینه ماڼۍ د ډیموکراټانو پر دغه اقدام ځکه په غوسه شوې چې د څېړنې اصلي محور يې پر ولسمشر ټرمپ او له روسیې سره د هغه پر احتمالي اړیکو څرخي.
د سپینې ماڼۍ ویاندې سارا سنډرز په یوه انتقادي بیان کې د ډیموکراټانو دغه اقدام له صلاحیتونو ناوړه استفاده او شرموونکی اقدام بللی دی.
دا په داسې حال کې ده چې له روسیې سره د سپینې ماڼۍ د اړیکو د ادعاوو په اړه د پراخې څېړنې په ترڅ کې، د کانګرېس د استازو جرګې د قضایي چارو کمېټې، ۸۱ کسانو او کمپنیو ته په استولو لیکونو کې په دې اړه د اسنادو د شریکولو غوښتنه کړې ده.
د سپینې ماڼۍ ویاندې سارا سنډرز دغه هڅې د کب له نیولو سره تشبه کړې او د دې کمېټې د مشر لهخوا څېړنه یې له صلاحیتونو ناوړه استفاده او د مایوسۍ وړ او د هغو ادعاوو په اړه ستړې کېدونکې هڅې بللې، چې د دې په خبره، د ځانګړي مفتش رابرټ مولر او د کانګرېس د دواړو جرګو د کمېټو لهخوا پر مخ وړل شوې دي.
سنډرز دغه راز ویلي، د قضایي کمېټې مشر ندلر او د هغه ملګري ډیموکراټان دغه بې نتیجې څېړنه ځکه کوي، چې له روسیې سره د اړیکو په اړه د تېرو دوو کلونو درواغ یې زوال ته نږدې دي.
د کانګرېس د استازو جرګې چې ډیموکراټان پکې اکثریت دي، د قضایي کمېټې مشر جرالد ندلر چې په دې اړه د څېړنې مشري کوي، ویلي چې دا د کانګرېس مسوولیت دی چې دا مسئله وڅېړي او ووايي چې ایا سپینې ماڼۍ له قدرته ناوړه استفاده کړې او که نه.
په هغو ۸۱ کسانو او کمپنیو کې چې دې کمېټې لیکونه ور استولي، روسي ميلیاردر ویکټور ویکسیلبرګ، ګرجستانيالاصله امریکایي سوداګر ایراکلي کاویلادژې او په سنټ پټرزبورګ کې دېره یویګني پریګوژین کمپنۍ چې ویل کېږي له کرېملېن سره نږدې اړیکې لري، هم شامل دي.
دغې کمېټې ویلي چې لومړی یې له دغو کسانو او کمپنیو غوښتي چې په خپله خوښه په دې اړه اسناد او شواهد ورسره شریک کړي، خو که دوی دا کار ونه کړي، له قانوني لارې به دا کار وکړي.
کله چې له ولسمشر ټرمپ څخه په دې اړه پوښتنه وشوه، چې ایا دې ته حاضر دی، چې له دې څېړنې سره همکاري وکړي، وویل چې له هر لوري سره یې تل همکاري کړې او کوي یې.
دغه اقدام داسې مهال کېږي چې ډیموکراټانو چې له تېرې نومبر میاشتې یې د استازو جرګې کنټرول په لاس کې اخیستی، د ولسمشر ټرمپ او د هغه د ۲۰۱۶ ز کال ټاکنیز کمپاین اړوند سیاسي او حقوقي مسایلو په اړه د یولړ څېړنو بهیر لا ګړندی کړی دی.
خو ولسمشر ټرمپ له مسکو سره د خپل ټاکنیز ټیم د اړیکو په اړه تورونه رد کړي او کرېملېن هم د امریکا په ټاکنو کې مداخله رد کړې ده.
