اردوغان: له روسیې د اېس ۴۰۰ سېستم پېرل امریکا ته ګواښ نه دی

د ترکيې ولسمشر رجب طيب اردوغان وايي، له روسيې د اېس ۴۰۰ ډوله توغنديو پېرل د امريکا له امنيت سره هېڅ اړيکه نه لري. اردوغان ویلي، ټول پوهېږي، چې دا موضوع د ناټو ايتلاف، له امريکا د اېف ۳۵ ډوله جنګي الوتکو له اخيستو او د دې هېواد له امنيت سره يوه وړه اړيکه هم نه لري. اردوغان ټينګار کړی، چې اصلي ترينګلتيا د اېس ۴۰۰ له کبله نه، بلکې په سوريه کې د ترکيې د خوځښتونو له کبله ده. د نوموړي په خبره، له روسيې د توغنديو پېرل او ورڅخه ګټه اخيستنه په بشپړه توګه څرګنده ده. اردوغان زياته کړې، هېواد به يې له روسيې سره د ملي ګټو پر بنسټ دغه تړون بشپړ کړي. اردوغان هيله څرګنده کړه، چې په دې برخه کې هم د انقرې او واشنګټن ستونزه حل شي. د امريکا د دفاع وزارت خبرداری ورکړی، چې که ترکيه له روسيې دا توغندي وپېري، خطرناکې پايلې به ولري.