د نیمې شپې کتابتون (The Midnight Library) د برېټانوي لیکوال مېت هېگ مشهور ناول دی چې د نړۍ په گوټ گوټ کې یې د میلیونونو لوستونکو زړونه گټلي دي.
دا کتاب لومړی ځل په ۲۰۲۰م کې خپور شوی او له هماغه وخت راهیسې یې په نړیواله کچه بېساری شهرت خپل کړی دی. دا ناول د نیویارک ټایمز د غوره پلورل شویو کتابونو په لېست کې راغلی او تر اوسه تر ۴۰ زیاتو ژبو ته ژباړل شوی دی؛ چې اوس پښتو هم ورسره یو ځای کېږي. د دې ناول پښتو ژباړه اغلې وږمې وردګ کړې او اکسوس کتابپلورنځي لخوا چاپ او خپور شوی دی.
د نیمې شپې کتابتون ناول د نورا سیډ په نامه د یوې نجلۍ پر ژوند راڅرخي، چې د ژوند له فشارونو، پښېمانیو او رواني ستونزو سره مخامخ ده. نورا فکر کوي چې ژوند یې بېمانا دی، ډېرې پښېمانۍ لري او ښه انتخابونه یې نه دي کړي.
د کتاب لیکوال مېټ هېګ د خپل دغه اثر په اړه وایي: ځکه مې ولیکه چې خلکو ته یو داسې څه وړاندې کړم چې د خپل ژوند په ارزښت پوه شي او هغه ته د یوې ارزښتمنې پدیدې په توګه وګوري.
د دې کتاب ژبه ساده، ادبي او عاطفي ده، چې هم د ځوانانو او هم د مشرانو لپاره مناسبه ده.
پښتو ته د دې کتاب ژباړه خورا ارزښت لري. زموږ په ټولنه کې رواني روغتیا یوه داسې موضوع ده چې لا هم پټه ساتل کېږي. دا ناول له لوستونکو سره مرسته کوي چې له ځان سره خبرې وکړي، خپل احساسات وپېژني او دا درک کړي چې ژوند تل دویم چانس یا فرصت لري.
د یادونې وړ ده چې دا ناول ۳۶۸ مخونه لري او په غوره کیفیت سره چاپ او د هېواد په مشهورو کتابپلورځیو کې د لاسرسي وړ دی.
