د ايران ولسمشر حسن روحاني چې په رسمي سفر عراق ته رسېدلى، د تهران او بغداد ترمنځ اړيکې ستايلې دي.
د نوموړي دغه سفر په داسې حال کې دی چې پر عراق د امريکا د متحده ايالتونو لهخوا فشار دى، څو له خپل ګاونډي هېواد ايران سره خپلې اړیکې محدودې کړي.
روحاني تېره ورځ عراق ته تر روانېدو مخکې د تهران په مهراباد هوايي ډګر کې د خبرو پر مهال د ايران او عراق ترمنځ اړيکې «ځانګړې» بللې او ستايلې یې دي.
روحاني ويلي: «موږ ډېر لېوال يو چې له عراق سره خپلې اړيکې پراخې کړو، په ځانګړي ډول د ټرانسپورټ په برخه کې خپله همکاري زياته کړو. موږ مهمې پروژې هم لرو، چې د دغه سفر په لړ کې به ورباندې بحث وکړو.»
عراق چې له واشنګټنه مالي او پوځي مرسته اخلي، هڅه کوي چې د امريکا له متحده ايالتونو او دغه راز له ايران سره چې د عراق پر شيعه وګړو د پام وړ نفوذ لري، په خپلو اړيکو کې توازن وساتي.
د ايران حکومت په يوه اعلاميه کې ويلي، چې حسن روحاني به په دغه سفر کې د عراق له لومړي وزیر عادل عبدالمهدي، ولسمشر برهم صالح او د عراق له وتلي شيعه مذهبي مشر ايتالله علي سيستاني سره وګوري.
که څه هم ايران په رسمي ډول په عراق کې پوځي حضور نه لري، خو په عراق کې د فعالو شيعه ملېشه ډلو ملاتړ کوي، چې اټکل کېږي د غړو او جنګياليو شمېر يې تر يو نيم لکو اوړي.
خو په عراق کې د مېشتو امريکايي پوځيانو شمېر ٥٢٠٠ ته رسېږي، چې تر ډېره يې تمرکز پر پوځي روزنه او د ملاتړ پر ماموريت دى.
دا په داسې حال کې ده چې د امريکا د متحده ايالتونو ولسمشر ډونالډ ټرمپ تېر زېږدیز کال د ايران او د نړۍ د شپږو پياوړو هېوادونو ترمنځ د ٢٠١٥ زېږدیز کال له اټومي تړونه د وتلو او پر تهران د بنديزونو د بيا لګولو اعلان وکړ.
دغه بنديزونه د ايران د انرژۍ، بېړۍ جوړولو صنعت او مالي سکټور په نښه کوي.
که څه هم عراق له دغو بنديزونو د محدود وخت لپاره معاف شوى، چې کولاى شي د ايران د برېښنا او طبيعي ګازو پېرلو ته ادامه ورکړي، خو د امريکا متحده ايالتونو له بغداده غوښتي، چې د انرژۍ له اړخه پر ځان د بسيا کېدو لپاره دې له امريکايي کمپنيو سره شراکت جوړ کړي.
تر دې مخکې، د يکشنبې په ورځ د ايران د بهرنيو چارو وزير محمدجواد ظريف د عراق پلازمېنې بغداد ته رسېدلى و.
هغه له بغداده مننه کړې چې د نوموړي په خبره، د ايران پر خلکو يې لګول شوي غير عادلانه او غير قانوني بنديزونه نه دي تاييد کړي.
ظريف ويلي، ايران او عراق دوه ګاونډيان دي چې بل هېڅ هېواد د دوى په اړيکو کې مداخله نه شي کولاى.
