د افغان حکومت د استازو او افغان طالبانو ترمنځ د لیدو کاتو په اړه د راپورونو تر خپرېدو وروسته د افغانستان د سولې عالي شورا وايي، تر دې دمه نه د سولې د عالي شورا او طالبانو او نه هم د افغان حکومت او طالبانو تر منځ رسمي لیده کاته شوي دي.
د دې شورا ريیس محمد کریم خلیلي پرون په کابل کې یوې خبري غونډې ته وویل چې د سولې خبرو د پيل لپاره جدي هلې ځلې کېږي او دوی هیله من دي چې بالاخره به دغه هدف ته ورسېږي:
«تر اوسه هېڅ ډول رسمي او نیغ په نیغه خبرې د دولت او طالبانو او د سولې د عالي شورا او طالبانو تر منځ نه دي ترسره شوې، هر څه چې دي د شایعاتو او اوازو په کچه دي او د اوازو بازار داسې ګرم دی چې څوک يي مخه نه شي نیولی».
خلیلي دغه څرګندونې وروسته له هغې کوي چې د رویټرز خبرې اژانس په حواله د طالبانو او افغان حکومت استازو تېره اونۍ په سعودي عربستان کې سره لیدلي دي.
دغه خبري اژانس د دریو طالب چارواکو له قوله لیکلي چې په دې ناسته کې د ولسي جرګې د انتخاباتو د امنیت او د بندیانو پر تبادلې خبرې شوې دي.
د ولسي جرګې ټاکنې د روانې مېزان میاشتې پر ۲۸ مه نېټه کېږي چې د امنیت او شفافیت په برخه کې يې اندېښنې موجودې دي.
د یادونې ده چې د روانې مېلادي میاشتې په پیل کې هم دې رسنۍ خبر ورکړی و چې ځينې طالب چارواکو ورسره د بندیانو د خلاصېدو او مذاکراتو د پیل په اړه خبرې کړې دي.
د سولې د عالي شورا د دریځ تر څنګ طالبانو هم له دې مخکې دغه دواړه راپورونه رد کړي دي؛ خو د افغانستان د سولې عالي شورا په ټینګار سره وايي، له دې سره چې دا کار نه دی شوی خو په ټوله کې د بې اعتمادۍ فضا مخ په ټولېدو ده.
د سولې شورا رييس کریم خلیلي وویل: «ټینګار کوم چې د سولې عالي شورا خپلې لاسته راوړنې لري او د بې باورۍ فضا او یخونه د حل او ویلي کېدو په حال کې دي».
په ورته وخت کې د چارو یو شمېر شنونکي په دې باور دي چې، له وسله والو طالبانو سره له تېرې څه باندې یوې نیمې لسیزې راهیسې د سولې د خبرو هڅې کېږي خو د سولې عالي شورا او افغان حکومت د دې پر ځای چې دا هدف تر لاسه کړي تل يي د خبرو د پیلیدو لپاره یوازې هیلې څرګندې کړې دي.
د حقوقو او سیاسي علومو پوهنځي استاد ودیر صافی د دغه کار لامل پر طالبانو د پاکستان فشار او د هغه هېواد لاسوهنې ګڼي.
دی وايي، سولې ته د رسېدو په خاطر باید افغان حکومت د نړیوالې ډيپلوماسۍ له لارې په ګاونډیو فشار واچوي تر څو په ټپه له درېدلي حالته ووځي.
