د لوګر په مرکز او دوو ولسواليو کې امنيتي ځواکونو د يو شمېر مهمو او ستراتېژيکو سيمو پوستې له جګړې پرته پرېيښي چې له امله يې خلک اندېښمن دي.
بل لور ته چارواکي بيا وايي چې دا پوستې د افغان ځواکونو او عامو خلکو د تلفاتو د مخنيوي په موخه پرېښودل شوې دي.
دغه پوستې په مرکز، بره کي برک او محمد اغې ولسوالۍ کې وې او اووه کاله وړاندې جوړې شوې وې.
د بره کي برک ولسوالۍ د چلتن سيمې قومي مشر عبدالله پژواک ته ويلي چې امنيتي ځواکونو اووه کاله وړاندې د دوى د سيمې پر يوې غونډۍ پوسته جوړه کړې وه.
ده زياته کړې: «دا پوسته ډېره تر تهديد لاندې وه، همېشه طالبانو پرې حملې کولې، خو څو ورځې وړاندې عسکر ترې لاړل او پوسته يې پرېښوده چې بيا وروسته طالبان ورغلل او پوسته يې ګډوډه کړه».
د عبدالله په وينا، د دې پوستې په پرېښودو سره خلک په دې باور شول چې حکومت نور نه شي کولى د طالبانو پر وړاندې جګړه وکړي.
دغه راز د محمد اغې ولسوالۍ د زرغون ښار سيمې اوسېدونکي حاجي داوود پژواک ته ويلي چې افغان ځواکونو د دوى له سيمې څخه هم خپله پوسته لرې کړې ده.
ده وويل: «له کلونو راهيسې دلته امنيتي پوسته وه، خو تېره ورځ يې خپله کډه بار کړه او لاړل، اوس ورته طالبان راغلي او خپل سپين بيرغ يې پرې پورته کړى دی».
د هغه په وينا، دغه پوسته د امنيت د ټينګښت له پلوه ډېره ګټوره نه وه، خو په سيمه کې يې د حکومت حضور ساتلى و.
همدارنګه د مرکز پل علم د دادوخېلو سيمې قومي مشر اغاجان ويلي: «دلته د غره په لمن کې يوه پوسته وه، کله نا کله به کلي ته د تالاشۍ لپاره راتلل، خو وړمه شپه يې هرڅه بار کړي او له دې ځايه تللي دي».
ده وويل، تر اوسه روښانه نه ده چې حکومت ولې دا پوسته پرېيښې، خو خلک اندېښنه لري چې حکومت نه غواړي نور د طالبانو پر وړاندې جګړه وکړي.
په دې اړه د لوګر د ولايتي شورا مرستيال عبدالولي وکيل ويلي چې د حکومت دغه اقدام د ستايلو دى.
د وکيل د معلوماتو له مخې، امنيتي ځواکونو د مرکز له دادو خېلو او التمور، د بره کي برک له چلتن، احمد کلا او خان تپې او د محمد اغې ولسوالۍ له زرغون ښار او ځينو نورو سيمو څخه پوستې لرې کړې دي.
ده زياته کړې: «په دې سيمو کې د طالبانو واک ډېر و، هره ورځ به امنيتي ځواکونو تلفات ورکول، حکومت ښه کار کړى چې دغه پوستې يې لرې کړې دي».
دغه راز د لوګر د والي وياند شمشاد لاروي پژواک ته ويلي چې له ځينو سيمو څخه امنيتي پوستې پرته له فشار او جګړې څخه ايستل شوې دي.
د هغه په وينا، د ولايت په امنيتي غونډه کې پرېکړه وشوه چې د عامو خلکو د مرګ ژوبلې د مخنيوي په موخه دې له دغو سيمو څخه پوستې لرې کړاى شي.
د خپرو شويو راپورونو له مخې، په يادو سيمو کې ډېرى وخت د امنيتي ځواکونو او طالبانو ترمنځ جګړې کېدلې چې مرګ ژوبله به يې هم لرله.
