باکیفیته پرمختګ د چين د پنځلسم پنځه کلن پلان (۲۰۲۶م ـ ۲۰۳۰م کال) کلیدي موضوع ده، چې د کمونېست ګوند د شلمې مرکزي کمېټې په څلورمې عمومي غونډې کې هم پرې بحث شوی او منل شوی دی.
باکیفیته پرمختګ د شي جين پينګ د اقتصادي مفکورې يوه مهمه برخه ده، چې د چين د پرمختګ لپاره ستر اهمیت لري.
نوموړي ویلي، بايد نه يوازې د اقتصادي چارو کميت ته پاملرنه وشي، بلکې دې کیفیت يې په پام کې ونيول شي او د کیفیت په لوړوالي دې د کميت اغېزمن زیاتوالی وموندل شي.
د ده په اند چين بايد د کميت او سرعت پر ځای د اقتصادي پرمختګ د کيفيت او موثريت د لوړوالي هڅې وکړي.
باکیفیته پرمختګ د چین د اقتصادي جوړښت په بدلون کې اړين انتخاب دی.
د چین اقتصاد په تېرو لسګونو کلونو کې ستر پرمختګ موندلی او عمومي اقتصادي حجم یې په نړۍ کې دوهم ځای نیولی، چې په جریان کې يې ډېرې ستونزې هم رامنځته شوې دي. په چين کې د پخوانيو ځیګو تولیدي لارو چارو له امله هوا، اوبو او کرنيزو ځمکو ته سخت زیانونه رسیدلي او د عوایدو په زیاتېدو سره یې د خلکو د ښوونې، طبي خدماتو او ښه چاپېریال اړتیاوې هم مخ په لوړېدو دي. برسيره پر دې، په نړۍ کې د ټکنالوژۍ د سیالۍ بڼه هم بدله شوې ده.
امریکا د لوړې او نوې ټکنالوژۍ په چارو کې پر چین بندیزونه لګولي دي. چين اړ دی، چې د نوښتي او ابتکاري توان د لوړولو لپاره ستراتيژیک پرمختګ وکړي.
ځکه د شي جين پينګ په مشرۍ د چین کمونېست ګوند د هېواد د اقتصاد او ټولنې د ابادۍ لپاره پر باکیفیته پرمختګ تمرکز لري.
باکیفیته پرمختګ د شي جين پينګ د مفکورې د يوې مهمې برخې په توګه نه یوازې د اقتصادي جوړښت د بدلون غوښتنه ده، بلکې د ټولنې، بیولوژیکي چاپېریال او کلتور په شمول ډېرو برخو کې سیسټماټیک سمون هم دی او هم د چیني شکله عصري کېدو د جریان لومړۍ چاره ده.
چین پر ۳ لارو د باکیفیته پرمختګ ښې لاسته راوړنې لري.
۱. نوښت او ابتکار
چین د ټکنالوژۍ په څېړنيزو او ابتکاري چارو کې ډېرې پانګې لګولي او نن يې د تخنیکي څېړوونکو عمومي شمېر په نړۍ کې لومړی مقام لري. دلته به یې د ساري په توګه د نوې انرژۍ کارکېدونکو موټرو ته اشاره ولرو. په چين کې د ځیرک تخنیک پر مټ د نویو موټرونو د چمتوالي موده د پخوا په نسبت ۲۰ سلنه کمه شوې، اصلي لګښت یې ۱۵ سلنه ټيټ شوی او کلنۍ تولیدي اندازه یې له لس ميلیونو عرادو څخه اوښتې ده.
۲. زرغون بدلون
چیني تصدیو به پخوا په تولیدي چارو کې ډېره انرژي لګوله، خو اوس ورته د ټيټ کاربن لارې چارې غوره شوې دي.
چین په ګرده نړۍ کې د بیا استفاده کېدونکې انرژۍ تر ټولو لوی سیسټم جوړ کړی او د لمریزې انرژۍ د شیشه يي تختو تولید او د بادي انرژۍ د جنراتورونو ظرفیت يې د نړۍ لومړي مقامونه خپل کړي دي.
۳. ورخلاصون
شي جين پينګ د چین د اقتصادي جوړښت د بدلون لپاره د کورني او نړیوال دورانونو ستراتيژي مطرح کړې او دغه ستراتيژي يې د هېواد په څوارلسم پنځه کلن پلان کې هم شامله وه او موخه یې ترې دا وه چې د کورني دوران له لارې د کورني ستر بازار بالقوه ځواک رامنځته او د نړۍ لوړې سرچینې راجلب کړي.
نړیوال دوران یانې د تخنیکي همکاريو او سرچینو د اغېزمنې کارونې په مټ د نړۍ د اکمالاتي او تولیدي ځنځیرونو پراخول.
سږ کال د چین په نړیوال وارداتي نندارتون کې د سوداګریزو تړونونو ارزښت له ۸۳ میلیارډو یوانو زیات و او نوی ریکارډ یې جوړ کړی دی.
چین د باکیفیته پرمختګ په مټ پنځلسم پنځه کلن پلان او د عصري کېدو موخه سره پيوست کړي، چې دغه جریان یې نه یوازې د اقتصادي اندازې زیاتېدو پسې تړاو لري، بلکې د پرمختګ لوړ کیفیت یې هم ترې ښکاري، چې په بهیر کې به یې هر څوک ترې ګټې واخلي.
چین به له نړۍ سره سمسور او دوامدار پرمختګ او ګډ راتلونکی ولري
