دا عکس د ۱۹۴۶ ز کال د اکتوبر په ۱۷ مه د رزمک په یوې جرګې کې واخیستل شو. یو سپین ږیری د پنډت نهرو مخې ته په قهر ولاړ دی.
جواهر لال نهرو هغه وخت د هند خارجه وزیر و او صوبه سرحد ته یې له خپل سفر نه مخکې پښتنو ملکانو او خانانو ته لیکونه ور استولي وو. په ځواب کې ځینو ورته د هر کلي پیغامونه لېږلي وو. د صوبې په اسمبلۍ (پارلمان) کې د ملتپالو غړو شمېر زیات و او اعلی وزیر ډاکتر خان (د باچاخان ورور) لېوال و چې نهرو باید د صوبه سرحد له خلکو او په تېره بیا له «ایپي فقیر» سره وویني.
نهرو د اکتوبر په ۱۷ مه په یوه وړه پوځي الوتکه کې میران شاه ته ورغلو. کله چې الوتکه په میران شاه کې کېناسته، له غرونو ورباندې ډزې وشوې. هلته ۴۰۰ شاوخوا اتمانزي وزیر ملکان د جرګې لپاره راټول وو. د باچاخان له پښتو خطاب وروسته دوی د نهرو خبرې نه اورېدې. یو چا ناره کړه چې د هند تېر حکومت له مسلمانانو سره ښه سلوک نه کاوه. ډاکتر خان ترې پوښتنه وکړه، ایا تاسو د انګریزانو تر لاس لاندې ژوند غواړئ؟ یوه ملک ورته وویل چې نه! موږ له انګریز سره په جنګ کې وینې تویې کړې دي او د بهرنیانو حکومت نه منو، مونږ په خپل حال پرېږدی.
بیا نهرو په الوتکه کې رزمک ته ورغلو. هلته ۱۰۰ شاوخوا مسید ملکان د انګریز استازي په مېشتځي کې راټول او د نهرو خبرو ته يې غوږ ونیوو. تر هغې ده هم خپله لهجه بدله کړې وه چې دی په هغوی حکومت کول نه غواړي؛ بلکې د مینې له پیغام سره راغلی دی. ناستو خلکو ورته وویل چې دوی هغه خپل مشر نه ګڼي او محمد علي جناح ته به خپل حال ووایي. هغه وخت خبرې ترخې شوې کله چې یو ملک په ډاکتر خان اعتراض وکړ. نهرو جرګه ختمه کړه او وويل چې دی د خپل همکار سپکاوی نه شي زغملی. پنډت نهرو د انګریز سیاسي استازي «رابرټ هاډسن» ته مخ واړاوه چې تاسو له دغو بېچاره پینشن خوارانو نه وېرېږی؟ دغه خبره چا مسیدو ته وژباړله چې دا یو ډول پېغور و. هم هغه وخت سپین ږیری ملک مهردل مسید وړاندې شو او نهرو ته يې له ښکنځلو سره سره د یوې څپېړې ورکولو ته لاس اوچت کړو، خو انګریز يې لاس ونیولو.
له دې وروسته نهرو واڼه ته لاړ، خو هلته احمدزیو او وزیرو ورسره د لیدو نه انکار وکړ. ایپي فقیر (میرزا علي خان) د ملاقات پر ځای نهرو ته یو لیکلی پیغام ور واستاو چې زه د هغو ټولو خلکو ملاتړی یم کوم چې د خپلواکۍ لپاره مبارزه کوي. دوی ټانک او جنډولې ته هم ورغلل چې هلته قبایلو ورته ګډان او د تناره ډوډۍ راوړه. د خیبر اپریدو له نهرو سره د لیدو نه انکار وکړ.
په پېښور او نورو ځایونو کې د باچا خان مخالف د مسلم لیګ یو مشر عبد القیوم خان د مظاهرو تابیا کړې وه. ده نه غوښتل چې سرخ پوش له دغه موقع څخه سیاسي ګټه واخلي. وروسته ملتپالو انګریزان په دې تورن کړل چې قبایل یې لمسولي دي. د دې دعوې تر شا څه نا څه حقیقت و، ځکه ملک مهردل ته انګریزانو زیات مراعات ورکړي وو او خپل قام ورته د شک په سترګه کتل.
