د جي شل یا د شلو صنعتي هېوادونو ډلې شلمه سرمشريزه د نومبر په ۲۳مه نېټه د جنوبي افريقا په جوهانيسبورګ ښار کې پای ته ورسېده.
د جي شل سرمشريزه په لومړي ځل افريقا کې ترسره شوه، چې پکې د نړۍ د سراسري جنوب هېوادونو پر چارو تمرکز شوی دی.
د سږنۍ سرمشریزې عمده موخه د يووالي له لارې د ننګونو پر وړاندې مقابله ښودل شوې ده.
د چين صدراعظم لي چيانګ هم په يادې سرمشريزې کې ګډون او وينا کړې ده. نوموړي ويلي، د جي شل غړي هېوادونه دې د يووالي او همکاريو له لارې د نړيوال اقتصاد بيا احيا او سمسورتيا وهڅوي او د تضادونو او ستونزو پر وړاندې دې مقابله وکړي.
ګډونوالو د سرمشريزې په لومړۍ ورځ يوه ګډه اعلاميه تصويب کړې، چې دا د بېلا بېلو خواوو د يووالي او همکاريو د لا پياوړتيا او د ننګونو پر وړاندې د ګډې مبارزې د ټينګ هوډ ښکارندويي کوي.
جي شل یا د شلو صنعتي هېوادونو ګروپ يو ميکانيزم دی، چې په ۱۹۹۹م کال کې جوړ شوی او همغه مهال په اسيا کې پولي بحران رامنځته شوی و.
جي شل د څه باندې شلو کلونو په پرمختګ سره د نړیوال اقتصادي مديريت مهم ډګر بلل کېږي. اوسمهال د نړيوال اقتصاد پرمختيايي انجين کمزوری دی او نړۍ له يو اړخيزم او ځاني سوداګرۍ ساتونکو ننګونو سره مخ ده او هم پکې بېلا بېل اقتصادي محدوديتونه او تضادونه مخ په زياتېدو دي.
د چين دولت رئيس شي جين پینګ په تېر سپتمبر کې د نړيوال مديريت وړانديز کړی او د نړيوال مديريت د ستونزو د لرې کولو لپاره يې چيني لايحه وړاندې کړې ده.
نړۍ په تمه ده، چې جي شل څو اړخيزم پلی او نړيوال مديريت بشپړ کړي او د مختلفو هېوادونو د ګډو پرمختګونو د موندلو لپاره هڅې وکړي.
د جي شل سږنۍ سرمشريزه د افريقا په لویه وچه کې ترسره شوه، چې دا نه يوازې د سراسري جنوب هېوادونو له خوا د نړيوال مديريتي سيسټم د اصلاحاتو د پرمخبېولو د ګډو هيلو ښکاروندويي کوي، بلکې د جي شل د پرمختګ او نړيوال مديريت لپاره يې افريقايي نښه هم ورکړې ده.
يووالی او همکارۍ د انساني پرمختګ کليدي برخه بلل کېږي او همدا د جي شل اصلي موخه ده.
رئیس شي جين پینګ په ۲۰۲۲م کال کې د اندونيزيا په بالي ټاپو کې د جي شل په سرمشريزې کې دې ته په اشارې وويل، چې يووالی د ځواکونو د راټولو سرچينه ده او بېلتون غوښتونکي لاره نه شي پيدا کولی. تر هغه وروسته، نوموړي په ۲۰۲۴م کال کې د برازيل په ريوديجانيرو کې د جي شل په سرمشريزې کې د مختلفو هېوادونو د ګډو پرمختګونو د پرمخبېولو لپاره وړانديز وکړ او د نړيوال مديريت د بشپړتيا لپاره يې نقشه وټاکله.
د جي شل سرمشريزه افریقا ته داخله شوې او د نړۍ د سراسري جنوب زیاتره هېوادونه د نړيوال مديريت په ميکانيزم کې هم ګډون لري، نو دغه ګروپ څنګه نوی پرمختګ ومومي او څنګه نړيوال اقتصادي پرمختګ پرمخبوځي؟
د چین د نړيوالو اړيکو د څېړنيز انسټيټيوټ او د برېکس او جي شل د مرکز مسؤل شيو في بياو سي اېم جي ته ويلي، چې چين څو اړخيزم پلی کوي او د انرژۍ، غلو دانو او مصنوعي ځيرکتيا په شمول د نړيوالې ټولنې او په تېره بيا د نړۍ د سراسري جنوب هېوادونو د پاملرنې وړ موضوعاتو په هکله يې يو لړ ژمنې کړي او د متزلزلې نړۍ لپاره يې ثابت عوامل زيات کړي دي، چې له دې څخه د نړيوال اقتصادي مديريت د لارښوونې لپاره د دغه هېواد رښتيني اقدامات ښکاري.
چين د جي شل د یوه مهم غړي او هم د پرمختيايي هېواد په توګه تل د افريقا اوازونه اورېدلي او د دغې لويې وچې هېوادونو سره اړيکو ته يې په درنه سترګه کتلي او هم يې له کړنو ملاتړ کړی دی.
چين په سږنۍ سرمشريزې کې پر دې ټينګار کړی چې د شلو هېوادونو ګروپ بايد پر څو اړخيزم ټينګار ولري او د نړيوال بانک، د پيسو نړيوال صندوق او د سوداګرۍ نړيوال سازمان په شمول د نړيوالو ارګانونو د اصلاحاتو د پرمخبېولو لپاره باید هڅې وکړي. چين
په ورته وخت کې دا وړانديز هم کړی، چې د جي شل غړي هېوادونه دې د مصنوعي ځيرکتيا پراخې چارې او اغېزمن مديريت پرمخبوځي، په کليدي کانونو کې دې د ګډو ګټو پر بنسټ د خپلمنځي همکاريو او د دغو کانونو د سوله يیزې کارونې لپاره هڅې وکړي او د نړۍ د سراسري جنوب هېوادونو د پرمختګ او د خلکو د ښه ژوند لپاره دې پياوړی ملاتړ برابر کړي. دغه اقدامات به په اړوندو برخو کې مديريتي اصول بشپړ کړي او د پرمختيايي هېوادونو ګټې به وساتي او هر تن به له لاسته راوړنو برخمن شي.
