د برېتانيې اېکونومېسټ «Economist» مجلې په دې وروستيو کې د امريکا د سروې ګلوبېسکا ”GlobeSca “ شرکت سره په ګډه له چين پرته د نړۍ په ۳۲ هېوادونو کې لویه سروې ترسره کړې او بیا یې د ۲۰۲۴م کال د ورته سروې له پايلې سره مقايسه کړې ده.
په دغې سروې د يادو هېوادونو شاوخوا ۳۲ زرو کسانو برخه اخيستې ده.
د مقايسې پايله ښيي، چې د نړۍ د لارښوونکو ځواکونو په لېست کې د چين ځای تر ډېره لوړ شوی او د دغه هېواد نرم ځواک د ليدو وړ پياوړتيا موندلې ده.
د دغې سروې يوه پوښتنه دا وه: «تاسې غواړئ چين يا امريکا د نړۍ سوپر ځواک شي؟»
د دغې پوښتنې ۳۳ سلنه ځواب ورکوونکو چين او ۴۶ سلنو يې بیا امريکا انتخاب کړې ده.
دلته مهمه خبره دا ده، چې د سروې په لويو هېوادونو کې د چين د انتخاب کچه ډېره لوړه شوې او د امريکا د انتخاب کچه بیا پوره ټيټه شوې ده.
دغه سروې د روان کال له جولای نه تر سپتمبر پورې ترسره شوې او همهغه مهال د امريکا ولسمشر ډونالډ ټرمپ له ټولې نړۍ سره د ګمرکي تعرفې جګړه پيل کړې وه.
د سروې دا پايله يوازې د چين په چټک پرمختګ پسې نه، بلکې د امريکا د حکومت په اړوندو تګلارو پسې هم تړاو لري.
د نړۍ د نرم ځواک په درجه بندۍ کې امريکا لومړی او چين بیا دوهم ځای خپل کړی دی.
د سروې د ګډونوالو جدول دا ښيي، چې له ۱۸ تر ۲۴ کلنۍ پورې د ځوانانو په ډله کې د چين او امريکا د انتخاب کچه په جلا جلا توګه ۳۹ سلنه او ۴۱ سلنه ده، چې دواړه دومره زيات توپير نه لري.
د حيرانۍ وړ خبره دا ده، چې د چين له لارښوونې څخه د امريکايانو د ملاتړ کچه زياته شوې او د ۴۰ سلنه امريکايي ګډون کوونکو په نظر چين پر نړۍ مثبته اغېزه لري.
کله چې په نړيوال وضعيت کې سخت بدلونونه رامنځته کېږي، نو د چين نرم ځواک د بې سارې پياوړتيا په حال کې وي او د نړۍ ځوانان هم د چين پرمختګ مني او تمې ترې لري.
د چين د سخت ځواک چټک پرمختګ او د نړيوال حالت بدلون او په تېره بيا د امريکا يو لړ کمزورې تګلارې د دغې پديدې د رامنځته کېدو سبب بلل کېږي.
د چين سخت ځواک د اقتصاد، علم او تخنيک او پوځ په شمول زياتو برخو کې په تېزۍ پياوړی شوی او د دغه هېواد د نرم ځواک پرمختګ ته يې ټينګ بنسټ برابر کړی دی. البته د چين دننه هم د نرم ځواک د پياوړتيا څو محرکې قوې شته دي.
۱- د کمربند او لارې نوښت د نړۍ مختلفو پرمختيايي هېوادونو ته فرصتونه برابر کړي او د چين اوسنۍ څېره په همدې اثر د دغو هېوادونو د خلکو په منځ کې جوړه شوې ده.
۲- په چين کې د عالي ټکنالوژۍ سمبالوونکي توليدات او علمي لاسته راوړنې، چې په نړۍ کې مخکښ ځایونه لري، پر له پسې رامنځته کېږي او نړيوال هم پرې باور لري چې دغه هېواد په علمي او تخنيکي چارو کې له امريکا سره يو شان سويه لري.
۳- چين له امريکا سره په سوداګريزه جګړه کې تل پر خپل دريځ ټينګار کړی او پر وړاندې يې سخته مبارزه کړې ده.
نړيوالو د چين له همدغه دريځ او مبارزې د دغه هېواد وړتيا او دنده حس کړې او پر دې اند دي، چين د نړۍ يوازينی هېواد دی چې له امريکا سره سيالي کولای شي.
۴- د انټرنېټ او ټولنيزو رسنيو کاروونکو پر چين د لوېديځو هېوادونو د خبري رسنيو تورونه رد کړي او بهرنيو ځوانانو په مختلفو چينالونو د چين رښتيني معلومات ترلاسه کړي دي.
د چين د نرم ځواک پياوړتيا د مخ په زياتېدونکو نړيوالو ځوانانو ګډه پېژندنه او د دغه هېواد د پرمختګ ثمره ده.
