د نومبر په ۲۵مه نېټه د چين د جيو چوان د سپوږمکيو د توغولو په مرکز کې د شن جو د ۲۲ م نمبر انسان وړونکې بېړۍ فضا ته توغول شوې او په همدې ورځ له فضايي سټېشن سره وصل شوې ده. تر هغه وروسته دغه بېړۍ به بېرته ځمکې ته د شن جو د ۲۱م نمبر ستورمزلو د ستنېدو وسيله هم وي. دا ځل د دې بېړۍ توغول د چين د انسان وړونکې فضايي پروژې لومړۍ بېړنۍ دنده ده او د چين د فضايي چارو د پياوړې وړتيا او تکنالوژۍ ښکارندويي کوي. د يادې بېړۍ توغول نه يوازې د چين په فضايي سټېشن کې له امنيتي پېښو سره د مقابلې لپاره يو مهم اقدام دی بلکې نړيوالو ته يې د امنيت، ورخلاصون او همکارۍ په محور د چين د فضايي چارو د پرمختګ مفکوره هم ښودلې ده.
څه موده دمخه د چين په فضايي سټېشن کې هغه پېښه رامنځته شوې چې د شن جو د شلم نمبر انسان وړونکې فضايي بېړۍ د ستورمزلو د بېرته راتګ د دستګاه کړکۍ له فضایي ټوټې سره ټکر کړی چې له دې امله ځمکې ته د ستورمزلو د بېرته راتګ دنده وځنډېدله. نو ځکه ځمکني کارکوونکو چټک اقدامات کړي او بېړنۍ لایحه يې پلې کړې چې ستورمزلي د شن جو د ۲۱م نمبر انسان وړونکې بېړۍ په وسيله په امن سره بېرته ځمکې ته راستانه شول. په ورته مهال د شن جو د ۲۲م نمبر انسان وړونکې بېړۍ د توغولو دنده هم شروع شوې څو همدا د نورو فضايي دندو د تر سره کولو لپاره ضمانت برابر کړي.
د چین له يادو فضايي اقداماتو څخه د چين د ليدو وړ سرعت ښکاري. تر دې وړاندې د امريکا ستورمزلي د انسان وړونکې فضايي بېړۍ د تخنيکي ستونزو له کبله په فضا کې د نهو میاشتو لپاره پاتې شوي دي.د چين او امريکا توپیري اقدامات د دې ښکارندويي کوي چې د باور وړ او چټک فضايي بېړني ژغورونکي سيستم په فضا کې د انسانانو د امنيت د تضمين لپاره ډېر مهم دی. د چين چټک او اغېزناک د فضايي ژغورنې بهیر د نړيوالې ټولنې لپاره يوه قيمتي نمونه جوړه کړې ده.
خو چين يوازې پر يادو برخو تمرکز نه کوي. د شن جو د ۲۲م نمبر انسان وړونکې فضايي بېړۍ له توغولو نه مخکې ساينس پوهانو د فضا د لټون نوې نقشه خپره کړې چې موخه يې د فضايي او ژوندانه سرچينو په هکله د سترو مسئلو د ځوابونو پیدا کول دي. په دې برخه کې د چين هڅې به د فضا په اړه د انسانانو د پوهې د زياتوالي لپاره ګټورې وي. اوس مهال چين هم په دې برخه کې خدمتونه کړي او کوي يې.
لا مهمه دا ده چې چين تل پر دې باور لري چې د فضا لټون د ټولو انسانانو ګډې چارې دي. د چين فضايي سټېشن په تاريخ کې لومړنی داسې فضايي سټېشن دی چې د ملګرو ملتونو د ټولو غړو پر وړاندې يې دروازه پرانيستې ده. تر اوسه پورې د څو هېوادونو ساينسي ازمايښتي پروژې انتخاب شوې او تر هغه وروسته به دلته پلې شي. د چين دغه پرانيستې روحيه هم په پراخو نړيوالو همکاريو کې ښکاري. چين د فرانسې، المان او ايټاليي په شمول له څو اروپايي هېوادونو سره ټينګ همکاريز بنسټ لري او په ورته وخت کې د منځني ختيځ هېوادونو په شمول له نړيوالو همکارانو سره ګډې هڅې کوي. د بېلګې په توګه چين د کومپس په نوم د لارښود او د فضايي استعداد لرونکو کسانو ترمنځ د نظريو د تبادلې په برخو کې له ايران سره همکارۍ کړې او له سعودي عربستان سره يې د سپوږمۍ د څارنې او د سپوږمکيو د ډيزاين او جوړولو په برخو کې لاسته راوړنې درلودلې دي. دغه راز چين هم د سپوږمۍ ځمکې د څېړنې په برخه کې د نورو هېوادونو غوښتنليکونه منلي او د دغو ځمکو نمونې يې د ملګرو ملتونو مقر ته لېږدولې چې له دې لارې يې له نورو هېوادونو سره فضايي لاسته راوړنې شريکې کړې دي.
یو چینایي اصطلاح ده چې د بې پایه فضا پر وړاندې ټول انسانان ګډ برخليک لري. چين به په دوامداره توګه په پرانيستې او ټولشمولې رويې سره د سولې او همکارۍ له لارې د فضايي چارو د پرمختګ او د انسانانو د نېکمرغه ژوند د لټون لپاره له نورو هېوادونو سره ګډې هلې ځلې وکړي.
