عمر زاخېلوال: پاکستاني ملایان پر طالبانو نفوذ لري، دوی دې سولې ته حاضر کړي

د افغانستان او پاکستان دیني علماوو د سولې په برخه کې پر ګډو هڅو ټینګار کړی دی. د رسنیو د راپورونو له مخې د پاکستان او افغانستان دیني علماوو، پرون د پاکستان په بهرنیو چارو وزارت کې غونډه لرله. په دې غونډه کې ددواړو هېوادونو دیني علماوو ټینګار کړی دی، چې سوله غوره لار ده او دواړه خواوې به د سولې لپاره خپلې هڅې کوي. په دغه غونډه کې غوښتنه شوې چې په راتلونکو ورته لیدنو کې به پر طالبانو اغېز لرونکي پاکستاني ملایان هم ګډون کوي. په اسلام اباد کې افغان سفیر عمر زاخېلوال چې په دغه غونډه کې حاضر و، ویلی پاکستاني ملایان پر طالبانو پوره تاثیر لري او ددوی دې له همدې مسئلې په استفادې دغه ډلې د سولې خبرو ته حاضرې کړي. د زاخېلوال په خبره د افغانستان امنیت د پاکستان د امنیت او ثبات سبب ګرځي نو پاکستان ته په کار ده، چې د افغانستان د امنیت او ثبات په اهمیت پوه شي. د افغانستان لپاره د پاکستان سفیر نصر الله حافظ هم په دغه غونډه کې ګډون کړی و. نوموړي ویلي چې د عمران خان په مشرۍ د پاکستان نوی حکومت د افغانستان سولې ته ژمن دی او په دې برخه کې به هېڅ راز همکاري و نه سپموي.