نیوزلنډ کې د ترهګریز برید د وژل شوو شمېر ۵۰ کسانو ته ورسېد

نیوزیلنډي پولیس وايي، په کرایسټ ‌چرچ ښار کې پر دوو جوماتونو بریدونو کې د یوه بل مړي په موندل کېدو سره د وژل شویو شمېر ۵۰ کسانو ته لوړ شوی دی.‌ پولیس وايي باوري دي چې بریدګر برنټون ټرنټ دا برید په یوازې سر کړی دی.‌ نیول شوی ۲۸ کلن تورن قاتل په بند کې دی.‌ برنټون ټرنټ چې د استرالیا دی او ځان سپین پوستی بولي، د تېرې جمعې په ماسپین د نیوزیلنډ‌ په کرایسټ چرچ ښار کې پر دوو جوماتونو بریدونه وکړل چې لږ تر لږه ۵۰ کسان یې ووژل او تر ۴۰ ډېر نور یې ټپیان کړل.‌ نوموړي پر خپل سر کامره لګولې وه او پر فیسبوک یې په ژونده بڼه د برید وېډیو خپروله. هغه په النور جومات تر خونړي برید وروسته په څلوېښت کیلومترۍ کې پر بل جومات برید وکړ او هلته یې هم پر لمونځ کوونکو ډزې وکړې خو لږ وروسته پولیس ور ورسېدل او ونیول شو.‌ د بریدونو په تړاو دوه نور مشکوک کسان هم نیول شوي چې په پام کې ده راتلونکې دوشنبه محکمې ته حاضر شي. په دغو بریدونو کې چې د نیوزیلنډ لومړۍ وزیرې ترهګریز بریدونه بللي، د دوو ماشومانو په ګډون ۵۰ کسان وژل شوي.