د نیوزیلنډ لومړۍ وزیرې ویلي، مشکوک بریدکوونکي پر دوو جوماتونو تر بریدونو څو دقیقې مخکې، له دېرشو زیاتو سیاستوالو او چارواکو ته په استولو پیغامونو کې دې ته هم یو پیغام استولی و، خو د کېدونکي برید په اړه یې ډېر جزیات نه وو ورکړي.
په هغه سند کې چې د نیوزیلنډ د کرایسټ چرچ د ښار پر دوو جوماتونو د بریدونو د قربانیانو په اړه برابر شوی، د وژل شویو کسانو عمرونه پکې د ۳ او ۷۷ کلونو ترمنځ ښودل شوي دي.
که څه هم تر اوسه د نیوزیلنډ چارواکو د تېرې جمعې د ورځې د ټولو قربانیانو بشپړ جزیات نه دي خپاره کړي، خو دغه لېست د قربانیانو د کورنیو له خوا تېره ورځ خپور شوی دی.
د دغه لېست له مخې په دواړو جوماتونو کې په بریدونو کې د ماشومانو په ګډون، ۴۴ سړي او څلور ښځې وژل شوې دي.
د نیوزیلنډ لومړۍ وزیرې جاسینډا ارډرن ویلي، چې دغه لېست رسمي نه دی او رسمي هغه به د ټولو قربانیانو د هویت له بشپړولو وروسته خپور شي.
د پاکستان د بهرنیو چارو وزارت هم په دغو بریدونو کې د نهو پاکستاني اتباعو وژنه تایید کړې ده.
په وژل شویو کې دغه راز د بنګله دېش، ترکیې، سعودي عربستان، اردن، اندونیزیا، مالیزیا، مصر او امریکا متحده ایالتونو اتباع هم شامل دي او دا په نیوزیلنډ کې د ډله ییزې وژنې تر ټولو لویه پېښه ګڼل شوې ده.
دا په داسې حال کې ده چې هغه ۲۸ کلن اسټرالیایي وګړی، چې وروسته نیول شوی او پر قتلونو تورن شوی، لومړی د کرایسټ چرچ ښار د النور په جومات کې پر لمونځ کوونکو ډزې کړې، لسګونه کسان یې وژلي او وروسته د ښار بل جومات ته تللی او هلته یې هم په ډزو ډېر خلک وژلي دي.
مشکوک برید کوونکي د انټرنټ له لارې د حملې یوه ویډیو او پیغام خپاره کړي، چې په هغه کې د مسلمانانو ضد څرګندونې شاملې دي.
د نیوزیلنډ لومړۍ وزیرې جاسینډا ارډرن دغه راز خبریالانو ته ویلي، چې د مشکوک حمله کوونکي له خوا له حملې مخکې دې ته هم د ايمېل له لارې پیغام استول شوی و، چې دې سمدستي په دوو دقیقو کې هغه له پولیسو سره شریک کړی دی. هغې ویلي چې په پیغام کې د حملې ځای او نور جزیات نه وو شامل.
دغه راز برید کوونکي له حملې نهه دقیقې مخکې له دېرشو زیاتو سیاستوالو او چارواکو ته هم پیغامونه استولي وو.
