د چين د خلکو ازادۍ بښونکي پوځ د ختيځې قوماندانۍ وياند لي شي د ډسمبر په ۳۰مې نېټې رسنيو ته ويلي، چې ځمکنيو ځواکونو يې د ډسمبر په ۳۰مې نېټې د سهار په نهو بجو د تايوان ټاپو په شمالي سمندري سيمو کې د تمرين پرمهال له لرې واټن څخه نښې ويشتلې دي.
د چين د ملي دفاع وزارت وياند جانګ شياو ګانګ يوه ورځ وړاندې یعنې د ډسمبر په ۲۹مې نېټې د انصاف وظيفه – ۲۰۲۵ په نوم د ياد پوځي تمرين په اړه رسنيو ته ويلي وو: ((مونږ له اړوندو هېوادونو څخه غواړو، چې د تايوان په کارولو د چين د مخنيوی خيال پرېږدي، د تايوان مسئله کې دې ستونزې نه جوړوي او د خپلو مرکزي ګټو د ساتلو لپاره دې د چين اراده او زعم نه ننګوي. مونږ د تايوان د پرمختګ ډيموکرات ګوند ته هم خبرداری ورکوو، چې پر بهرنيو قوتونو د تکيې له لارې د تايوان د جلا غوښتنې هڅې ودروي او د چين د وحدت د مخنيوي هره هڅه به یې هرومرو ناکامېږي.))
نوموړي زیاته کړې، د چین د خلکو ازادۍ بښونکي پوځ د بېلتون غوښتونکو پر وړاندې د مبارزې او د هېواد د وحدت هڅې نه درېغوي او د ملي حاکمیت، یووالي او ځمکنۍ بشپړتیا د ساتنې لپاره به د بېلتون غوښتونکو او بهرنیو لاسوهنو ضد اقداماتو ته دوام ورکړي.
