د چين د دولت رئيس شي جين پينګ د ۲۰۲۵م کال د ډسمبر د ۳۱مې نېټې په ماښام د نوي ۲۰۲۶م کال د رارسېدو په مناسبت د مبارکۍ وينا وکړه.
شي جين پينګ په خپله وينا کې ويلي، چې چين به له مختلفو هېوادونو سره يو ځای نړيواله سوله او پرمختګ پرمخ بوزي او د انسانانو د ګډ برخليک ټولنه به اباده کړي. د ده وينا له نړيوالې ټولنې سره د چين د همکارۍ او ګډو هڅو ټينګ هوډ ښودلی دی.
د زياتو هېوادونو چارواکو او کارپوهانو د چين د ميډيا ګروپ له لارې د شي جين پينګ د وينا له اورېدلو يا د ويډيو له کتلو وروسته د چين لاسته راوړنې او د يوه لوی هېواد په توګه مسئولانه بڼه ستايلې او هيله يې څرګنده کړې، چې د نړيوال مديريت په اړه د شي جين پينګ د وړانديز په رڼا کې همکارۍ پياوړې کړي او د انسانانو د ښکلي راتلونکي لپاره ګډې هلې ځلې وکړي.
۲۰۲۵م کال په چين کې د پنځلسم پنځه کلن پلان د پلي کېدو وروستی کال دی او په همدې کال کې د چين پرمختګونه، لاسته راوړنې او د تګلارو مسلسل تطبيق د نړيوالو شخصيتونو په توجو او خبرو کې د پام وړ موضوعات ګرځيدلي دي.
د شي جين پینګ په وينا، د چین د ۲۰۲۵م کال اقتصاد حجم ښايي ۱۴۰ ټريليونه يوانو ته ورسیږي. د سريلانکا د کمونېست ګوند د مرکزي کمېټې عمومي منشي جي ويراسينګهي د چين اقتصادي برياليتوب ستايلی او د ۲۰۲۵م کال اټکلي اقتصادي حجم يې د دغه هېواد د اقتصادي او ټولنيز پرمختګ پياوړی او انعطاف منونکی قوت بللې دی.
د تايلنډ د ډهوراکيج پونديت پوهنتون د عامه ادارې پوهنځي مرستيال کيټيکا ساويتامورنکو دې ته په اشارې ويلي، د شي جين پينګ وينا دا په ډاګه کړې، چې چين د پرمختګ په نقشه کې کيفيت، نوښت، د خلکو ګټو او نړيوالې همکارۍ ته لومړيتوب ورکوي او پر مسلسلو تګلارو او ثابت پرمختګ ټينګار کوي.
د ويتنام د ټولنيزو علومو اکاډامۍ د ((فلسفه)) مجلې پخوانۍ عمومي مديرې نګوين تهي لان هونګ ويلي، د شي جين پينګ په وينا کې”د خلکو په ژوند پورې تړلی هر کار مهم دی“ ياد شوي او ترې څرګنديږي، چې دغه هېواد تل د رښتينو اقداماتو له لارې د عامو خدمتونو د سويې د لوړوالي او د خلکو د باور د بنسټ د ټينګوالي په هڅه کې دی.
د نړيوالې همکارۍ او نړيوال مديريت په برخو کې د چين مسئولانه بڼه د نړيوالې ټولنې له خوا پېژندل شوې. د کينيا د کبينې لومړي وزير او خارجه وزير مصاليې موداوادي هيله ښودلې، چې د کمربند او لارې د ګډې ابادۍ له لارې د افريقا د صنعتي کېدو بهير او د افريقا او چين ترمنځ سوداګريزو همکاريو ته وده ورکړي. نوموړي زياته کړې، هيله لري چې چين د نړيوال مديريت وړانديز پرمخ بوزي او له افريقايي ټولنې سره د لا عادلانه او ټولشموله څواړخيزم د جوړولو لپاره ګډې هڅې وکړي.
په چين کې د اندونيزيا پخواني سفير سويګانګ رهاردجو ويلي، چې د شي جين پينګ وينا د مختلفو هېوادونو د سوله ييز او دوستانه ګډ ژوند او متقابل درناوي په اړه د ګډې هلې څرګندویي کوي.
د ويتنام د خبر او اطلاعاتو پوهنځي د فيلوسفې انستېتيوټ مشر نګوين مين هاون ويلي، چې د شي جين پينګ وينا دا روښانه کړې، چې چين په نړيوال سیسټم کې له ګډون څخه د نړيوال سیسټم د جوړولو رول ته مخه کړې ده او په نړۍ کې د لوی هېواد ستراتيژيک لرليد او مسئولانه بڼه ښيي.
کلتوري تبادله او د ګډو ګټو برياليتوب د نړيوالو شخصيتونو ګډې هيلې دي. د نايجريا د چين او افريقا د مسئلو څېړنيز مرکز مدير شيريف ګالي عبراهم د شي په وينا کې د ټېکنالوژيک نوښت او کلتوري ساتنې په اړه موضوعات د افريقايي هېوادونو لپاره ګټور بللی او ويلي يې دي، چې ” د ۲۰۲۶م کال لپاره د چين او افريقا د کتلوري تبادلې کال فعاليتونه “ به د دواړو خواوو د خلکو ترمنځ متقابل تفاهم او اړيکې لا پياوړې کړي.
د شي جين پينګ په وينا کې هغه ژمنتيا، چې چين به له مختلفو هېوادونو سره يو ځای نړيواله سوله او پرمختګ پرمخ بوزي او د انسانانو د ګډ برخليک ټولنه به اباده کړي، د نړۍ د پيوستون د روحي کمربند ارزښت لري. د سريلانکا د کمونېست ګوند د مرکزي کمېټې عمومي منشي جي ويراسينګهي ويلي، چې د چين سمسورتيا او پرمختګ به د پرمختيايي هېوادونو په شمول د نړۍ د مختلفو هېوادونو ګډ پرمختګ او هوساينې ته پياوړی خوځنده قوت ورسوي.
