د پاکستان مرستیال صدراعظم او بهرنیو چارو وزیر محمد اسحاق ډار د چین کمونېست ګوند د مرکزي کمېټې د سیاسي بیورو غړي او بهرنیو چارو وزیر وانګ يي په بلنه د جنورۍ په ۳مې نېټې بېجينګ ته تللی او له دغه هېواده یې درې ورځنۍ لیدنه کړې ده.
وانګ يي له اسحاق ډار سره په پلازمېنې بېجینګ کې د چین او پاکستان د بهرنیو چارو وزیرانو د ستراتيژيک ډیالوګ، چې د جنورۍ په ۴مې نېټې ترسره شو، مشري کړې ده.
دواړو خواوو د دوه اړخیزو اړیکو، ستراتيژیو، سیاست، دفاعي چارو، اقتصاد، سوداګرۍ، پانګونې او کلتور په شمول ځينو برخو کې پر خپلمنځې همکاریو د نظریو تبادلې کړي او هوکړه يې کړې، چې خپلمنځي ستراتيژيک ډیالوګ به پياوړی او ستراتيژيک باور به ژور کړي او د سیمې او نړۍ سوله او سمسورتیا به پرمخ بوځي.
دوی په ټينګار ويلي، چې چین او پاکستان په ټولو فصلونو کې ستراتيژيک مشارکت لري او دواړه هېوادونه به «په نوې زمانه کې د چین او پاکستان د ګډ برخلیک ټولنې د جوړونې پلان (۲۰۲۹-۲۰۲۵)» تطبیق کړي.
چین د پاکستان ستاینه کړې، چې د ترهګرۍ ضد مبارزې او په دغه هېواد کې د چیني پرسونلو، پروژو او ارګانونو د امنیت لپاره يې اغېزمن عملیات او مهم خدمتونه کړي دي.
دواړو خواوو پر دې ټينګار کړی، چې د هر ډول ترهګرۍ ضد مبارزه کې به د صفر زغم پالیسې غوره کوي او موافقه یې کړې چې د ترهګرۍ ضد په عملیاتو کې به خپلمنځي همکارۍ نورې هم ژورې کړي او د کمربند او لارې د ګډو پروژو د عادي روانېدو لپاره به اوږه په اوږه هڅې وکړي.
دواړو وزیرانو پر نړیوالې ټولنې غږ کړی، چې د ترهګرۍ ضد مقابله کې خپلمنځي همکارۍ پياوړې کړي او په دغه برخه کې یې له دوه ګوني معیار سره سخت مخالفت ښودلی دی.
دواړو خواوو موافقه کړې، چې د چین- افغانستان- پاکستان د بهرنیو چارو وزیرانو ډيالوګ او د چین- بنګله دېش- پاکستان همکاريز میکانېزم ته نوي پرمختګونه ورکړي.
دوی نیت ښودلی، چې د ګردې نړۍ د پرمختګ، امنیت، تمدن او مدیریت وړاندیزونو په چوکاټ کې به خپلمنځي همکارۍ وهڅوي او د لا عادلانه او مناسب نړيوال مدیریتي سیسټم جوړونه به پرمخ بوځي.
د پاکستان خارجه وزیر د پرمختیايي هېوادونو د دوامدار پرمختيايي حقونو په ساتلو کې د چین کوښښونه ستایلي دي.
چين او پاکستان د ملګرو ملتونو او د شانګهای همکارۍ سازمان په شمول څو اړخیزو ارګانونو کې پر خپلمنځي همکاريو خوښي ښودلې او هوکړه يې کړې، چې د پرمختیايي هېوادونو د ګډو ګټو او نړیوال عدالت د ساتلو لپاره به همغږي نوره هم پیاوړې کړي.
دواړو خواوو يو ځل بیا پر دې ټینګار کړی، چې د نړۍ ټول هېوادونه باید د ملګرو ملتونو د منشور اصول او موخې مراعات کړي، له څواړخیزم او ازادې سوداګرۍ باید ملاتړ او له زورواکۍ او پر نورو له تيري سره مخالفت وښيي او هم باید د کوچنيو ډلو ټپلو له جوړونې او ډله ییزې مقابلې له راپارېدو سره مخالفت وکړي.
چین پاکستان ته مبارکي ویلې، چې د ملګرو ملتونو د امنیت شورا د نوبتي رئیسه هېواد په توګه یې خپله دنده ښه ترسره کړې ده.
چین به د شانګهای همکارۍ سازمان د راتلونکې دورې رئیسه هېواد په توګه د پاکستان له کارونو پوره ملاتړ وکړي.
دواړو خواوو موافقه کړې، چې د افغانستان مسئلې په اړه به نظر تبادلې او همکارۍ وساتي او د افغانستان حکومت به وهڅوي چې ټولشموله او نرمې تګلارې غوره او د پرمختګ تمرکز او له ګاونډیو سره ښې اړیکې ټينګې کړي.
دواړه خواوې به د افغانستان د ثابت پرمختګ او له نړیوالې ټولنې سره د دغه هېواد د پیوستون لپاره لا زیات رغنده رول ولوبوي.
چين او پاکستان د افغانستان پر اوسني حکومت غږ کړی، چې د ټولو ترهګریزو ډلو د پاکولو لپاره نور زیات اغېزمن تدبیرونه ونیسي او کومې ډلې ته باید اجازه ور نه کړي، چې د افغانستان خاوره د نورو پر ضد استعمال کړي او تاوانونه ور واړوي.
