په ملګرو ملتونو کې د چين د دايمي پلاوي لنډمهاله شارژدافير سون لي د جنورۍ په پنځمې نېټې د وينزويلا د وضعيت په اړه د امنيت شورا بېړنۍ غونډې ته ويلي، چې هېواد یې د وينزويلا په مقابل کې د امريکا يو اړخيزې، غيرقانوني او ځورونکې کړنې په کلکه غندلې دي.
نوموړي ويلي، نړيوالې ټولنې څو څو ځلې پر وينزويلا د امريکا د بنديزونو او وسله والو ګواښونو په اړه سختې اندېښنې څرګنده کړې وې او ملګرو ملتونو په همدې اړه دوه ځلې بېړنۍ غونډې ترسره کړې وې.
په دغو غونډو کې د ملګرو ملتونو عمومي منشي انټونيو ګوټرېش، د امنيت شورا ډېرو غړو او د سيمې هېوادونو او د سيمې پرته نورو هېوادونو له امريکا څخه غوښتي وو، چې د ملګرو ملتونو منشور او نړيوال قوانين مراعات کړي، زغم او سړه سينه وساتي، په سوله يیزو لارو چارو کشالې لرې او ترينګلتياوې کمې کړي او د سيمې ثبات وساتي. خو امريکا، چې د ملګرو ملتونو د امنيت شورا دايمي غړې هم ده، د نړيوالې ټولنې پاملرنې او غوښتنې له پامه وغورځولې او د وينزويلا پر ملي حاکميت، امنيت او حقه حقونو يې تېری وکړ.
نوموړي ويلي، امريکا د ملي حاکميت د مساواتو، په کورنيو چارو کې د نه لاسوهنې، په سوله ييزو لارو چارو د نړيوالو کشالو د لرې کولو او په نړيوالو اړيکو کې له زوره د کار نه اخيستلو له اصولو څخه سرغړونه کړې ده. دغه هېواد پر وينزويلا بریدونه وکړل او څو اړخيزم او ډيپلوماتيکې هڅې يې له پامه وغورځولې او دغې کړنې يې د لاتينې امريکا او کارابين او حتی د نړۍ سولې او امنيت ته جدي ګواښ پېښ کړی دی.
چين د وينزويلا پر وړاندې د امريکا له بريدونو سره ټينګ مخالفت او غندنه یې کوي او نړيواله ټولنه هم د وينزويلا اوسنی وضعيت څاري او د امريکا کړنې يې غندلې دي.
