د چين دولت رئيس شي جين پينګ د جنورۍ په ۴مې نېټې د ګيني نوي منتخب ولسمشر مامادي دومبويا ته د مبارکۍ پيغام لېږلی دی.
نوموړي په پيغام کې ويلي، ګيني په افريقا کې د صحرا جنوبي خوا ته لومړی هېواد دی، چې د چين له ولسي جمهوريت سره يې رسمي اړیکې جوړې کړې دي او په خبره یې، دواړو هېوادونو په تېر اوږدمهال کې پر متقابل درناوي او مساوات ټينګار کړی، د ګډې علاقې وړ مسئلو په اړه يې يو له بل څخه ملاتړ کړی او د ګډ پرمختګ په بهير کې يې ښې همکارۍ کړې دي.
شي جين پينګ ويلي، چې هغه د چين او ګيني د اړيکو پرمختګ ته په درنه سترګه ګوري او غواړي د ګيني له ولسمشر مامادي دومبويا سره يو ځای د دواړو هېوادونو د هراړخيزو ستراتيژيکو همکاريزو اړيکو د لا پياوړتيا لپاره هڅې وکړي او د دواړو هېوادونو خلکو ته زياتې ګټې ورسوي او د سراسري جنوب د يووالي لپاره ښه خدمتونه وکړي.
