د ناټو د ٢٤ غړو او متحدو هېوادونو شاوخوا ٣٥٠ پوځيانو په ګرجستان کې ګډ پوځي تمرينونه پيل کړي دي.
د راپورونو له مخې، تبلیسي ته نږدې د ناټو او ګرجستان د ٢٠١٩ ز کال د تمرينونو په نوم دغه تطبيقات به ١١ ورځې دوام وکړي.
ناټو په يوه اعلاميه کې ويلي، چې دغه تمرينونه د ناټو او ګرجستان د پوځي او سياسي همکارۍ د غښتلتيا لپاره ډېر اړین بلل کېږي.
د راپورونو له مخې، ټاکل شوې چې د ناټو سرمنشي ينس سټولټنبرګ هم د دغو تمرينونو پر مهال ګرجستان ته لاړ شي او دى به په دغو تمرينونو کې برخه واخلي او د دې تر څنګ به د ګرجستان له مشرانو سره هم وګوري.
د ګرجستان دفاع وزارت هم ویلي چې په دغو پوځي عملیاتو کې د متحده ایالتونو، فرانسې، برېټانیا، جرمني او ترکیې په ګډون، د ناټو ۲۰ هېوادونه برخه لري.
د ګرجستان د دفاع وزارت مرستیال للا چیکوواني د دغو تمرینو د پیل مراسمو پر مهال ویلي: «د ناټو- ګرجستان ترمنځ د پیل شوو تمرینونو موخه یوازې د دغه هېواد د دفاعي وړتیاوو پیاوړي کېدل دي، نه د کوم درېیم هېواد پر ضد».
د ګرجستان او ناټو د دغو عملیاتو د پیل کېدو په اړه روسیې تر اوسه کوم غبرګون نه دی ښودلی، خو تر دې وړاندې یې ویلي، چې د ناټو هر پاروونکی اقدام به بې ځوابه پاتې نه شي.
دا په داسې حال کې ده چې په دې وروستیو کې د ناټو او روسیې ترمنځ د کرېمیا ټاپووزمې په بېلېدو او ځینو نورو نړیوالو مسایلو اړیکې د بل هر وخت په پرتله ترېنګلې شوې دي.
په ورته وخت کې د روسيې ولسمشر ولادیمير پوتين تېره ورځ د کريميا سيمې ته رسېدلی دی. ویل کېږي چې نوموړی به د هغه څه په پنځمه کليزه کې برخه واخلي، چې مسکو يې له روسيې سره د تور سمندرګي د دې ټاپووزمې يو ځاى کېدل ګڼي، خو کييف او غربي قدرتونو له روسيې سره د کريميا يو ځاى کېدل غير قانوني بللي دي.
دا مسئله د دې سبب شوه چې پر ځينو روسي اشخاصو او شرکتونو بنديزونه ولګول شي. پوتين دغه راز تېره ورځ په سيواستيپول او سيم فيريپول ښارونوکې دوه برېښناکوټونه هم پرانيستل.
دغه برېښناکوټونه تېر کال په ابتدايي ډول پرانيستل شوي وو، خو رسمي پرانیسته یې تېره ورځ وشوه.
