د چين د دولت رئيس شي جين پینګ ځانګړي استازي او د دغه هېواد د ملي ولسي کانګرېس د دايمي کمېټې مرستیال مشر جنګ جيان بانګ د جنورۍ په ۱۷مې نېټې د ګيني په پلازمېنې کوناکري کې د ولسمشر دوومبویا د لوړې په مراسمو کې ګډون کړی دی.
نوموړی ګيني ته د ولسمشر دوومبويا په رسمي بلنه تللی او د يادو مراسمو په څنډه کې يې ورسره لنډه لیدنه هم کړې ده.
جنګ جيان بانګ ولسمشر دوومبويا ته د رئیس شي جين پینګ صميمانه سلامونه او نيکې هيلې وړاندې کړي او ويلي يې دي، چې هېواد يې له ګيني سره د اړيکو پرمختګ ته په درنه سترګه ګوري او د ستراتيژيکو همکاريزو اړيکو د لا پرمختيا لپاره به ورسره ګډې هڅې وکړي.
ولسمشر دوومبويا له جنګ جيان بانګ څخه غوښتي، چې رئیس شي جين پینګ ته يې صادقانه نيکې هيلې ورسوي او د لوړې مراسمو ته يې د نوموړي له ګډون مننه کړې ده.
نوموړي ويلي، ګيني له چين سره عنعنوي دوستۍ ته په درنه سترګه ګوري او په بېلا بېلو برخو کې به ورسره خپلمنځي همکارۍ لا پياوړې کړي او دوه اړخيزو اړيکو ته به یې نوی پرمختګ ورکړي.
