د چین حکومت د جنورۍ په ۱۹مې نېټې يو لړ شمېرې خپرې کړي، چې له مخې یې په تېر ۲۰۲۵م کال کې د دغه هېواد اقتصادي پرمختګ ۵ سلنې ته رسېدلی دی.
د ايکيو ایر شرکت(IQAir) اجرائیوي مدیر فرانک هام په دې اړه ویلي، د چین اقتصاد له پيچلي بهرني چاپېریال سره سره ثابت پرمختګ موندلی، انعطاف پذيري یې ښودلې او نړیوالو شرکتونو ته یې ګټور فرصتونه برابر کړي دي.
د چین دغه ۵ سلنه اقتصادي پرمختګ د نړیوال اقتصاد په چوکاټ کې ډېر ارزښت لري.
تېر کال د چین د څوارلسم پنځه کلن پلان د تطبیق وروستی کال و، په همدې کال کې د چین ناخالص کورنی توليد په لومړي ځل ۱۴۰ ټریلیونو یوانو ته رسېدلی او د اقتصاد او ټولنې د پرمختیا عمده موخې یې بشپړې شوې دي، چې دغو چارو د دغه هېواد د پنځلسم پنځه کلن پلان د پلې کېدو لپاره ښه بنسټ هم برابر کړی دی.
د چین د اقتصادي زیاتوالي سرعت د نړۍ په عمده وو اقتصادونو کې مخکښ ځای لري او په نړۍ کې د اقتصادي پرمختګ ثابت او د باور وړ اېنجن یادېږي او د نړیوال اقتصاد لپاره یې د خدمتونو انډول ۳۰ سلنې ته رسېدلی دی.
ځینو نړیوالو سازمانونو د چین د اقتصادي پرمختګ وړاندوینې لوړې کړي او د مورګان او بلېکروک په شمول نړیوالو پولي شرکتونو په چین کې پانګونې زیاتې کړې دي او دا د دې ښکارندويي کوي، چې نړیواله ټولنه د چین د اقتصادي پرمختګ پر راتلونکي باور لري.
که د چین د ۲۰۲۵م کال د اقتصادي چارو کلني راپور ته مراجعه وشي، نو ثبات پکې د پاملرنې وړ ځانګړتيا ده. که څه هم په همدغه کال کې د دغه هېواد پر وړاندې د کمزوري نړیوال اقتصاد په شمول ځینې بهرنۍ ننګونې موجودې وې، خو بیا هم کرنیزې چارې، صنعت او خدمتي چارې يې د ثابت پرمختګ په حال کې وې، د توکو د بیو ګراف یې د وړم کال په نسبت برابر و، په ښارونو او ښارګوټو کې يې د وزګارتيا منځنی انډول ۵ اعشاریه ۲ سلنه و، د روزګار کچه یې ثابته وه، د موادو سوداګریز ارزښت یې بیا لوړ شوی، د بهرنیو اسهامو د زېرمې ارزښت یې له ۳.۳ ټریلیونو امریکايي ډالرو اوښتی و او اقتصادي چارې یې د ثابت پرمختګ په حال کې وې.
چین د نړۍ د دوهم لوی اقتصاد په توګه له فشارونو سره سره ثابت اقتصادي پرمختګ موندلی، چې دا د نړۍ لپاره ښه خبر دی.
د چین د اقتصاد لوی ګامونه او نوښتونه د پاملرنې وړ دي.
په ۲۰۲۵م کال کې د چين د توکو د صادراتو او وارداتو عمومي ارزښت د وړم کال په نسبت ۳ اعشاریه ۸ سلنه زیاتوالی موندلی او د هر تن په سر عواید يې ۵ سلنه لوړ شوي دي. په همدې کال کې د چين د های نان ولایت ازاد سوداګریز بندر فعال شو، چې په دې سره یې د لوړې کچې ورخلاصون یو بل ګام هم پورته کړی دی.
د چين د نوي کیفیت تولیدي ځواک مخ په پراخېدو دی او د ټکنالوژۍ او ساینس په څېړنو کې يې یو لړ بریالیتوبونه ترلاسه کړي دي.
تېر کال د چین د علمي څېړنو لګښت د اقتصادي همکارۍ سازمان د غړو هېوادونو له منځنۍ سویې لوړ و او نوښتي ګراف یې په لومړي ځل د نړۍ په مخکښو لسو مقامونو کې و.
د چین د اقتصاد انعطاف پذيري هم د پاملرنې وړ ده، ځکه متزلزل نړیوال اقتصاد ته یې ثبات برابر کړی دی.
د امریکا د سي اېن بي سي چينل په شمول ځینو رسنیو ویلي، د چين اقتصاد په داسې حال کې پرمختګ کړی، چې د نړۍ اقتصاد او سوداګريز نظم د امریکا د لوړو تعرفو له امله خراب او متزلزل شوی او د ناثابتوالي عوامل يې مخ په زیاتېدو دي.
چین د څه باندې ۱۶۰ هېوادونو او سیمو عمده همکار دی او ډېرو هېوادونو ته لوړه ټکنالوژي او لوړ اضافي ارزښتمن محصولات صادروي.
تېر کال د چين د توکو د وارداتو ارزښت ۱۸.۵ ټریلیونو ډالرو ته رسېدلی او مختلفو هېوادونو ته یې لوی بازار وړاندې کړی دی.
اوس په ګردې نړۍ کې جیوپولیټیکي سیاست مخ په سختېدو دی او د سوداګرۍ پروټیکشن هم د پیاوړې کېدو په حال دی، خو د چین اقتصاد د اوږدمهاله ثابت پرمختګ ملاتړ او تمایل نه دی بدل کړی او اټکل کېږي، چې د پنځلسم پنځه کلن پلان په موده کې به یې د اقتصادي پرمختګ وړتیاوې نورې هم پراخې شي.
د چین اقتصاد انعطاف پذيره دی او د ورخلاصون ارادې يې نړۍ ته دا باور ورکړی، چې دغه هېواد به په راتلونکي کې هم د نړیوال اقتصاد هڅوونکی اېنجن او د نوښت سرچینه وي.
