د چین دولت ريئس شي جین پینګ د جنورۍ د ۲۳مې نېټې په سهار د برازیل له ولسمشر لويز لولا سره ټیلیفوني خبرې کړې دي.
شي جین پینګ له برازيلي سیال سره په خبرو کې ويلي، چې هغه په ۲۰۲۴م کال کې له ولسمشر لولا سره د یوې عادلانه او داومدارې نړۍ د ابادولو لپاره د چین ـ برازیل د ګډ برخلیک ټولنې د جوړولو اعلان وکړ او له همغه وخت راهیسې، دواړو هېوادونو د ګډ برخلیک ټولنې د جوړولو بهیر په ښه ډول پیل کړی او د پرمختیايي هېوادونو لپاره يې د یووالي او همکاريو ښه بېلګه جوړه کړې ده.
نوموړي د نړۍ اوسنی وضعیت بې ثباته او متزلزل یاد کړی او ويلي يې دي، چې چین او برازیل دې د مهمو قدرتونو په توګه د نړۍ د سولې او ثبات د ساتنې لپاره رغنده رول ولوبوي، د تاریخ په سم لوري دې ګامونه واخلي او د ملګرو ملتونو د مرکزي رول او نړیوال عدالت ملاتړ دې وکړي.
د چين دولت رئیس شي جين پينګ په ۲۰۲۴م کال کې برازیل ته تاریخي سفر کړی و او د دواړو هېوادونو اړیکې يې د یوې عادلانه او دوامدارې نړۍ د جوړولو په پار لوړې کچې ته پورته کړې، چې په رڼا کې يې د دواړو هېوادونو ترمنځ بېلا بېلو همکاريو د پام وړ پرمختګونه موندلي دي.
لولا له چيني سیال سره په خبرو کې ويلي، هېواد يې چمتو دی چې له چین سره ګډ کار وکړي او ورسره خپلمنځي اړیکې او هم د لاتیني امریکا – چین اړیکې لا پراخې او ژورې کړي.
ولسمشر لولا برازیل او چین د څو اړخیزم د دفاع او د ازادې سوداګرۍ د ملاتړ مهم ځواکونه بللي او اوسنی نړیوال وضعیت يې د اندېښنې وړ ياد کړی دی.
نوموړي ويلي، برازیل به له چین سره نږدې همکارۍ وکړي، د ملګرو ملتونو رول به وساتي، د برېکس هېوادونو همکارۍ به پیاوړې کړي او د سیمې او نړۍ سوله او ثبات به خوندي وساتي.
