«د غزې وروستۍ شپه» ناول خپور شو

د غزې وروستۍ شپه ناول چې یو ټولنیز ـ انساني اثر دی، د غزې په تړانګه کې د یوې عادي کورنۍ ژوند انځوروي. کیسه له ساده او تودو شېبو پیلېږي، خو دا شېبې ډېر دوام نه مومي.
لیکوال په روانه او انځوریزه ژبه د یوې کورنۍ د کیسې له لارې، د یوې ټولنې کړاوونه، ستونزې او نه ماتېدونکی هوډ انځور کړی دی. لوستونکي د غزې په کوڅو ګرځوي؛ د وچې ډوډۍ خوند پرې څکي؛ د بارودو تریخ بوی پرې حس کوي؛ په کنډوالو يې راګرځوي؛ په ناهیلۍ کې يې د هیلې په لور بیايي…
اثر سمبولیکه بڼه هم لري او د تورې کومېډۍ له لارې د جګړې اصلي څېره لا پسې بربنډوي.
د دې تازه خپاره شوي ناول یوه لوستونکي احمد مدثر ویلي چې د دې ناول په لوستو سره داسې احساس کوي لکه تازه چې له غزې راغلی وي او په ژوند یې دا غمیزه سر په سترګو لیدلې وي.
د دې نوښتګر اثر لیکوال ښاغلی محمد طارق صابر دی، کتاب ۱۵۵ مخونه لري او تازه اکسوس کتابپلورنځي چاپ او خپور کړی دی.