د چين صدراعظم لي چيانګ د جنورۍ د ۲۹مې نېټې په ماسپښين په بېجينګ کې له خپل برېتانوي سيال کېر ستارمر سره لیدلي دي.
لي چيانګ له کېر ستارمر سره په لیدنې کې ويلي، چې چين او برېتانيا پر ورخلاصون او ګټې- ګټې همکارۍ ټينګار لري، چې دا د خلکو له هيلو او د دواړو خواوو له ګډو ګټو سره سمون لري. چين نيت لري چې له برېتانوي لوري سره د حکومتونو د ډيالوګ او همکارۍ ميکانيزم بشپړ کړي او په مختلفو کچو او ساحو کې خپلمنځي تګ راتګ ورسره لا زيات کړي.
نوموړي ويلي، دواړه هېوادونه دې يو د بل له ښيګڼو څخه ګټې پورته کړي، دوه اړخيزه سوداګري دې لا زياته او کيفيت دې يې لوړ کړي، پولي څارنه او د يو بل پولي بازارونو پيوستون دې پياوړی کړي او مصنوعي ځيرکتيا، عصري توليد، پاکې انرژۍ، ډيجټلي اقتصاد او عصري هوايي او سمندري ټرانسپورټ په شمول نويو چارو کې دې خپلمنځي همکارۍ پراخې کړي، څو لا نور ښه پرمختګونه ومومي.
د برېتانيې لومړي وزير کېر ستارمر په خپلې وينا کې څرګنده کړې، چې هېواد به يې له چين سره د متقابل درناوي پر بنسټ او په ډاګیزه توګه د لوړ پوړيو تګ راتګ او په مختلفو ساحو کې د نظريو تبادلې زياتې کړي او د ازادې سوداګرۍ، اقتصاد او کلتور په شمول ځينو چارو کې به ورسره خپلمنځي همکارۍ زیاتې او ملاتړ به ترې وکړي.
هغه په برېتانيا کې د چيني تصديو د پانګونې هرکلی کړی او نيت يې ښودلی چې دواړه هېوادونه به څواړخيزې همغږۍ لا زياتې کړي او د نړيوالو ننګونو پر وړاندې به ګډې مقابلې وکړي او د دوه اړخيزو اړيکو نوې پاڼه به پرانيزي.
د چين او برېتانيې اړوندو ادارو د دواړو صدراعظمانو په حضور کې د اقتصاد او سوداګرۍ، کرنيزو او خوراکي توکو، خبري رسنيو، ښوونې او بازاري څار همکاريز سندونه لاسليک کړي دي.
