د روسیې د بهرنیو چارو وزارت ویاندې ماریا زاخارووا د جنوري په ۳۰مه نېټه په یوه مطبوعاتي غونډه کې وویل، چې د نړۍ د یو له لویو اقتصادونو په توګه، چین په نړیوال اقتصادي سیسټم کې مهم رول لوبوي.
زاخارووا په دې مطبوعاتي غونډه کې هغې پوښتنې ته چې چين نه یوازې “نړيواله فابریکه” بلکې”نړيوال بازار” هم وګرځي او تاسې يې څنګه ارزوئ؟ په ځواب کې وويل چین اوس مهال د ورخلاصون تګلاره پراخوي او په فعاله توګه د مصرف او وارداتو په لور اقتصادي وده هڅوي او دې کار نه یوازې د چینایانو د ژوند د ښه کولو لپاره قوي بنسټ ایښی دی، بلکې د نورو هېوادونو لپاره یې هم داسې فرصتونه برابر کړي، چې چیني بازار ته خپل صادرات زياتولی شي او له دغه هېواد سره خپلمنځي عملي همکارۍ پیاوړې کولی شي.
زاخارووا د روسیې او چین د اقتصادي او سوداګریزو همکاریو د يادونې په وخت کې وويل، چې د روسیې او چین د انرژۍ همکارۍ ژور بنسټ لري او په چین کې د روسیې کرنیز محصولات او خواړه د خلکو ډېر خوښېږي.
زاخارووا وویل په ۲۰۲۵م کال کې د روسیې او چین ترمنځ دوه اړخیزه سوداګري یو ځل بیا له ۲۰۰ ميلیاردو ډالرو څخه اوښتې ده، چې د دواړو هېوادونو ترمنځ د اقتصادي او سوداګریزو اړيکو د دوامدارې پراختیا ښکارندويي کوي.
