د چين دولت رئيس شي جين پينګ د فبرورۍ د ۴مې نېټې په ماسپښين د پلازمېنې بېجينګ د خلکو له لوی تالار څخه د روسيې له ولسمشر ولاديمير پوتين سره ويډيويي ملاقات وکړ.
شي جين پينګ دې ته په اشارې ويلي، چې د روسيې له ولسمشر ولاديمير پوتين سره يې په تېر ۲۰۲۵م کال کې دوه ځله ليدلي او په ګډه يې د دواړو هېوادونو ترمنځ اړيکې د پرمختګ نوي پړاو ته رسولې دي. ده زياته کړه چې دواړو هېوادونو د فاشيزم ضد نړيوالې جګړې د برياليتوب د ۸۰مې کليزې په وياړ فعاليتونه تر سره کړي او د دوهمې نړيوالې جګړې د برياليو پايلو او د نړۍ د عدالت د ساتلو په اړه يې ټينګ هوډ ښودلی دی.
شي جين پينګ پر دې ټينګار کړی، چې روان کال د چين د پنځلسم پنځه کلن پلان د تطبيق له پيل سره برابر دی او چين به د لوړې کچې د ورخلاصون د پياوړتيا لا فعال ګامونه پورته کړي او له روسيې او نورو هېوادونو سره به د پرمختګ نوي فرصتونه شريک کړي.
شي جين پينګ زياته کړې، چې روان کال د چين او روسيې ترمنځ د ستراتيژيکو همکاريزو اړيکو د ټينګېدو له ۳۰مې کليزې، د چين او روسيې د ښه ګاونډيتوب او همکارۍ تړون د لاسليک له ۲۵مې کليزې او د چين او روسيې د ښوونې کال فعاليت د جوړولو له لومړي کال سره برابر دی. دغه راز دواړه خواوې بايد د تاريخ له فرصتونو څخه کار واخلي، د لوړې کچې تګ راتګ دې پياوړی کړي، د بېلا بېلو برخو عملي همکارۍ دې زياتې کړي، ستراتيژيکې همغږي دې لا ژورې کړي، د لويو هېوادونو د مسئوليتونو د پلي کولو لا فعال او اغېزمن ګامونه دې پورته کړي او د خپلمنځي اړيکو سالم پرمخګ دې ډاډمن کړي.
شي جين پينګ ويلي، چې چين او روسيه د مسئولانه لوی هېوادونه او د ملګرو ملتونو د امنيت شورا دايمي غړي دي او د عدالت او انصاف لپاره د نړيوالې ټولنې د هڅولو، د دوهمې نړيوالې جګړې د برياليو پايلو د ساتلو، د ملګرو ملتونو په مرکزيتوب د نړيوال سيسټم او د نړيوال قانون د اصلي اصولو د تامينولو او د نړۍ د ستراتيژيک ثبات د ډاډمنولو په برخو کې مسئوليتونه لري.
پوتين د روسيې او چين ترمنځ د اړيکو د پرمختګ په اړه پوره باور ښودلی او ويلي يې دي، چې دواړه خواوې به د ملي حاکميت او امنيت د ساتلو په برخه کې د مقابلې خوا د اقداماتو ټينګ ملاتړ وکړي، اقتصادي او ټولنيز پرمختګ به ومومي، د ښوونې او کلتور تبادلې به پياوړې کړي او د دواړو هېوادونو خلکو ته به ګټې ورسوي. روسيه به د ملګرو ملتونو، شانګهای همکارۍ سازمان او برېکس په شمول په څواړخيزو ډګرونو کې له چين سره ستراتيژيکې همغږۍ پياوړې کړي.
دواړو مشرانو د ګډې علاقې وړ نړيوالو او سيمه ييزو چارو په اړه د نظريو تبادلې کړې دي.
