د چين دولت رئيس شي جين پينګ د فبرورۍ د ۴مې نېټې په شپه د امريکا له ولسمشر ډونالډ ټرمپ سره ټليفوني خبرې کړې دي.
نوموړي له امريکايي سیال سره په ټلیفوني خبرو کې په اشارې ويلي، چې امريکايي لوری خپلې اندېښنې او پاملرنې لري، خو د چيني لوري اندېښنې او پاملرنې هم باید له نظره ونه غورځول شي.
شي جين پينګ ويلي، چين به خپلې ژمنې خامخا پوره کوي او د خپلو کړنو پړه پرغاړه لري او په خبره يې، که چين او امريکا د مساواتو، درناوي او متقابلو ګټو پر بنسټ پر يو لوري ګامونه پورته کړي، نو د يو بل د اندېښنو د ليرې کولو لارې پيدا کولای شي.
هغه ويلي، چې چين او امريکا به په روان کال کې زياتې مهمې او سترې چارې ترسره کړي او په خبره یې، دواړه خواوې دې د شوې اجتماع په رڼا کې خپلمنځي تماسونه او ډيالوګونه زيات کړي او خپلمنځي توپيرونه دې کنټرول او خپلمنځي واقعي همکارۍ دې پراخې کړي. دغه راز هر کار دې ښه ترسره او متقابل باور دې زيات کړي، څو د ګډ ژوند سمه لار يې وموندل شي.
هغه تايوان د چين او امريکا په اړيکو کې تر ټولو مهمه مسئله ياده کړې او ويلي يې دي، چې تايوان د چين خاوره ده او بېجينګ به د هېواد ملي حاکميت او د خاورو بشپړتيا خوندي ساتي او هیچا ته به اجازه ور نه کړي، چې تايوان ترې وشکوي او ترې جلا یې کړي. نو امريکايي لوری باید پر تايوان د پوځي وسايلو په پلور کې محتاط واوسي.
د امريکا ولسمشر ډونالډ ټرمپ په خپلو خبرو کې امريکا او چين دوه لوی هېوادونه او اړيکې يې د نړۍ تر ټولو پياوړې دوه اړخيزې اړيکې بللې دي. هغه ويلي:
”زه له رئيس شي جين پينګ سره ښې اړيکې ساتم او درناوی ورته لرم. امريکا او چين زما او رئيس شي جين پينګ تر لارښوونې لاندې د اقتصاد او سوداګرۍ په شمول ډېرو برخو کې ګټور تعامل کړی دی. زه د چين پر برياليتوب خوښ يم. امريکا نيت لري چې له چين سره لا زياتې همکارۍ ولري او خپلمنځي اړيکو ته يې نوی پرمختګ ورکړي. زه په تايوان مسئله کې د چين اندېښنې ته په درنه سترګه ګورم او له چيني لوري سره به ټينګ تماسونه ولرم او د خپل ماموريت په موده کې به د دواړو هېوادونو د اړيکو ثبات وساتم.“
