په ملګرو ملتونو کې د چين مرستيال دايمي استازي سون لې د فبرورۍ په ۴مې نېټې په امنيت شورا کې د ترهګرۍ ضد مسئلې يوې علنۍ غونډې ته په وينا کې پر نړيوالې ټولنې غږ کړی، چې د ترهګرۍ ضد مبارزې لپاره ګډې هڅې وکړي.
ښاغلي سون لې ويلي، په ټوله نړۍ کې ترهګريز ګواښونه ورځ تر بلې سختېږي او کله نا کله په ځينو سیمو کې سخت ترهګريز بريدونه پېښېږي او د ترهګرو تخنيکي چلند پر له پسې پرمختګ کوي، چې دا به نړيوالې ټولنې ته جدي ګواښونه ورسوي. د ده په خبره، نړيواله ټولنه بايد د امنيت د ګډو، مجموعي، همکاريزو او دوام لرونکو نظريو په لرلو سره د ترهګريزو ډلو پر وړاندې هېڅ زغم ونه ساتي، د ترهګرۍ ضد له انتخابوونکو پاليسيو او دوه ګونو معيارونو سره باید سخت مخالفت وکړي، خپلمنځي يووالی او همکارۍ بايد پياوړې کړي، د ترهګرۍ ضد مبارزې لپاره باید ګډې هڅې وکړي او نړيواله سوله او ارامتيا باید خوندي وساتي.
هغه دا هم ويلي نن ورځ د داعش، القاعدې او ختيځ ترکستان اسلامي غورځنګ په شمول ترهګريزې ډلې افغانستان او ګاونډي هېوادونه يې پر له پسې ګواښي. چين د افغانستان له لنډ مهالي حکومت څخه غوښتنه کوي چې د اغېزمنو اقداماتو په نيولو سره ترهګرو ته سخته ضربه ورکړي او ټول ترهګر دې له منځه يوسي، څو افغانستان په راتلونکي کې بيا د ترهګرو د راغونډېدو پناه ځای ونه ګرځي. چين په دې اړه د منځنۍ اسيا هېوادونو او شانګهای همکارۍ سازمان څخه ملاتړ کوي چې له افغانستان سره اړوندې همکارۍ زياتې کړي، د نړيوالې ترهګرۍ پر وړاندې ګډې مقابلې وکړي او د اقتصادي پرمختګ په پار ورته مرستې برابرې کړي، څو د ترهګرۍ سرچينې له بيخه يووړل شي.
