د چين او يوراګوی ترمنځ شل زره کيلومتره واټن دی، خو بیا هم په چين کې د يوراګوی سره شراب او غوايي غوښه ډېر مشهور دي او هم چينايان د دغه هېواد د فوټبال د لوبغاړو ډېر مېنوال دي.
په دې وروستيو کلونو کې د چين او يوراګوی ترمنځ دوستي او همکارۍ نورې هم ډېرې شوې دي.
د یوراګوی ولسمشر ياماندو اورسي د فرورۍ له لومړۍ نېټې څخه تر اوومې نېټې پورې له چين څخه رسمي ليدنه کړې او دغه سفر یې د نړيوالو رسنيو پراخه پاملرنه راجلب کړې ده.
ولسمشر اورسي چين ته د سفر په ترڅ کې د دغه هېواد له دولت رئيس شي جين پينګ سره لیدلي او د دواړو هېوادونو پر اړيکو یې ورسره خبرې کړې دي.
شي جين پينګ له اورسي سره په لیدنې کې ويلي، که نړيوال وضعيت هرڅنګه بدلېږي، چين او یوراګوی به همیشه يو له بل سره د متقابل درناوي او ګډو ګټو پر بنسټ چلند کوي او په خبره یې، دواړه خواوې به په نوې زمانه کې راشه درشه ډېره کړي او هراړخیزې ستراتيژيکې همکاريزې اړيکې به نورې هم ژورې او خپلمنځي دوستي به پياوړې کړي.
اورسي د يوراګوی او چين ترمنځ هراړخيزې ستراتيژيکې همکاريزې اړيکې د تاریخ تر بل هر وخت ښې بللي او په وينا یې، له چين سره اړيکو ته پرمختګ ورکول یې د هېواد ملي تګلاره ګرځېدلې او هيله يې ښودلې، چې دواړه هېوادونه به خپلمنځي همکارۍ نورې هم پياوړې کړي.
چين د یوراګوی لپاره تر ټولو لوی صادراتي بازار او وارداتي سرچينه ده. دواړه هېوادونه څنګه همکاريو ته وده ورکولی شي؟
چين او یوراګوی به د پرمختګ د پلانونو په اړه د نظريو تبادلې وکړي او په ښه توګه به يې پيوست کړي، د سوداګرۍ، پیسو، زراغت، مالدارۍ، اساسي تأسیساتو او مخابراتو په برخو کې به ژورې همکارۍ وکړي او د زرغون پرمختګ، ډيجيټلي اقتصاد، مصنوعي ځيرکتیا او پاکې انرژۍ په برخو کې به د همکارۍ پټ توان ښکاره کړي.
چين په پام کې لري، چې له يوارګوی څخه لازیات غوره محصيلات وارد کړي او خپلې تصدۍ په يوراګوی کې پانګونې ته وهڅوي.
چين او یوراګوی د سوداګرۍ او پانګونې په شمول څو برخو کې ۱۹ همکاريز تړونونه لاسليک کړي دي.
يوراګوی په جنوبي امريکا کې دی. د چين او يوراګوی ترمنځ دوستانه تګ راتګ د چين او لاتيني امریکا د اړيکو يوه ښه بېلګه ده او هم د سراسرۍ جنوب د يووالي څرګندويي کوي.
اوسنۍ نړۍ کې پيچلي بدلونونه روان دي او د يو اړخيزتوب او پروټېکشنيزم څپې پکې پورته شوې دي.
که د نړۍ سراسري جنوبي هېوادونه يووالی وساتي او همکارۍ زیاتې کړي، نو ګډ پرمختګ موندلی او نړۍ ته ثبات رسولی شي.
لاتيني امريکا او کارابين هېوادونه د سراسري جنوب مهمې برخې او په بهرنيو همکاريو کې د چين مهم ملګري دي.
د چین او يوراګوی مشرانو په دې ليدنې کې سراسري جنوب هم ياد کړی دی.
شي جين پينګ ویلي، چې چين به له يوراګوی سره د سراسري جنوب همکارۍ پياوړې کړي او د نړۍ د څو قطبي کېدو او د اقتصاد د نړیوال کېدو لپاره به ورسره ګډې هڅې وکړي.
اورسي د انسانانو د ګډ برخليک ټولنې په اړه د شي جين پينګ د مفکورې لوړه ستاينه کړې او هيله يې ښودلې، چې له چين سره همکارۍ زیاتې کړي او د سراسرۍ جنوب ګډې ګټې ورسره وساتي.
