یونیسف: غزې ته مرستې او طبي لیږدونه ډېره محدوده ده

د ملګرو ملتونو د ماشومانو د ملاتړ صندوق (یونیسف) پر خپله اېکس پاڼه لیکلي، چې د رفح د بندر بېرته پرانیستل یو مهم او د هرکلي وړ ګام دی، خو لا هم بشري مرستې له همدې لارې غزې ته نه رسېږي او طبي لیږدونه ډېره محدوده ده. یونیسف ویلي، چې د ماشومانو د ژوند د ژغورلو لپاره باید ټول بندرونه او لارې په پراخه کچه او هممهاله توګه پرانیستل شي او د دواړو خواوو خلکو ته د خوندي او باعزته تګ راتګ زمینه برابره شي. یادې ادارې ټینګار کړی چې د طبي لیږدونو سملاسي او د پام وړ زیاتوالی حیاتي ارزښت لري، ځکه ډېری ماشومان په کړکېچن وضعیت کې دي او بېړنۍ درملنې ته اړتیا لري. مرستندویي بنسټونو تر دې مخکې خبرداری ورکړی و چې د محدودیتونو دوام به په غزه کې بشري وضعیت لا پسې خراب کړي او د زرګونو ماشومانو ژوند به له جدي خطر سره مخامخ دی.