د سولې عالي شورا وايي، د افغان سولې په اړه د امریکا نوی دریځ به د افغان حکومت او طالبانو ترمنځ د سولې بهیر چټک کړي.
د دې شورا ویاند سید احسان طاهري وايي: «د سولې په اړه د امریکا ټول اقدامات د افغان حکومت او د سولې عالي شورا سره په مشورې ترسره کېږي.»
طاهري له ازادي راډیو سره په خبرو کې ویلي، چې له طالبانو سره د امریکا له قید او شرط پرته خبرې به د حکومت او طالبانو ترمنځ د مذاکراتو لپاره ښه پیلامه وګرځي: «د امریکا متحدو ایالتونو تل په خپلو اقداماتو کې له موږ سره همکاري کړې او له شک پرته نن یې چې کومه موضوع اعلان کړې، د افغان حکومت او طالبانو ترمنځ د خبرو لپاره اسانتیاوې رامنځته کولای شي.»
دا په داسې حال کې ده چې د افغانستان لپاره د امریکا ځانګړي استازي زلمي خلیلزاد تازه ویلي، چې امریکایان حاضر دي، څو له قید او شرط پرته له طالبانو سره خبرې وکړي.
خلیلزاد له ځینو لوېدیځو رسنیو سره په خبرو کې ویلي چې د امریکا متحده ایالتونه غواړي د افغانستان د قضیې لپاره مناسبه حللاره ومومي.
خلیلزاد دغه راز ویلي چې پاکستان غواړي له طالبانو سره د مذاکراتو د پیلولو په برخه کې له امریکا سره همکاري وکړي.
په ورته وخت کې د مشرانو جرګې دویم مرستیال محمد اصف صدیقي وايي، چې د افغان سولې په اړه د امریکا تازه دریځ لوی پرمختګ دی، خو باید عملي شي.
نوموړي زیاته کړې: «د خلیلزاد دغه څرګندونې په دې معنا دي چې د امریکا متحده ایالات د سولې له پروسې په جدي توګه ملاتړ کوي او غواړي چې د افغان حکومت او طالبانو ترمنځ مذاکراتو ته زمینه برابره کړي. دغه دریځ د ولسمشر غني له مخکیني دریځ سره ورته دی، خو هیله لرو چې عملي شي او طالبان سولې ته اړ شي.»
دا په داسې حال کې ده چې څه موده وړاندې په سعودي عربستان کې د افغان چارواکو او وسله والو طالبانو ترمنځ د خبرو اترو راپورونه خپاره شول، خو د سولې عالي شورا رییس کریم خلیلي د شنبې په ورځ په کابل کې وویل، چې تر دې دمه د افغان حکومت او وسله والو طالبانو ترمنځ خبرې اترې نه دي شوي.
