د چين د کمونېست ګوند د مرکزي کمېټې سياسي بيورو غړي او بهرنيو چارو وزير وانګ يي د اپرېل په ۱۳مې نېټې د پاکستان له مرستيال صدارعظم او بهرنيو چارو وزير اسحاق ډار سره تليفوني خبرې کړې دي.
ډار چيني سیال ته د ايران او امريکا ترمنځ د مذاکراتو لپاره د پاکستان د منځګړيتوب وضعيت ورپېژندلی، د چين د ګډو هڅو مننه يې کړې او هيله يې ښودلې، چې د سيمه ييزې سولې لپاره له چين سره نږدې اړيکې او همغږي وساتي.
وانګ يي له اسحاق ډار سره په تليفوني خبرو کې د چين اصول او دريځ بيا بيان کړي او د پاکستان د هغو خدمتونو ستاينه يې کړې، چې د امريکا او ايران ترمنځ لنډمهالی اوربند يې هڅولی، د اسلام اباد د خبرو کوربتوب يې کړی او په منځګړيتوب کې يې د عدالت او برابرۍ رول لوبولی دی.
وانګ يي زياته کړې، د ايران او امريکا ترمنځ روان اوربند له ډېرو ننګونو سره مخ دی او سيمه ييز وضعيت هم د بدلون په مهم پړاو کې دی.
نوموړي د جنګ د بيا پيل مخنيوی او د اوربند ډاډمنتوب اوسنۍ تر ټولو مهمې دندې بللي او ويلي يې دي، چې نړيواله ټولنه بايد د ايران او امريکا ترمنځ د سوله ييزو خبرو د هڅولو لپاره هلو ځلو ته دوام ورکړي او د اوربند د ماتولو او د مقابلې د پارولو له کړنو سره بايد ټينګ مخالفت وکړي.
وانګ يي زیاته کړې، د خليج او منځني ختيځ د سولې او ثبات لپاره د چين او پاکستان ۵ فقره ييز وړانديز د نړيوالې ټولنې د توافقاتو څرګندويي کوي او د مسئلې د حل لور يې روښانه کړی دی.
چيني لوری په اړوندو چارو کې د پاکستان د رول پياوړتيا ته په درنه سترګه ګوري او له نړيوالې ټولنې سره به د منځني ختيځ د سولې او ټيکاو د اعاده کولو لپاره ګډې هڅې وکړي.
