د چين دولت رئيس شي جين پينګ د اپريل د ۱۴مې نېټې په سهار په بېجينګ کې د خلکو په لوی تالار کې د متحده عربي اماراتو د ابوظبۍ له وليعهد شيخ خالد بن محمد بن زايد ال نهيان سره لیدلي دي.
شي جين پينګ له شيخ خالد بن محمد سره په خبرو کې متحده عربي امارات د چين هراړخيز ستراتيژيک ملګری هېواد بللی او په خبره یې، چين له متحده عربي اماراتو سره د اړيکو پراختيا ته په درنه سترګه ګوري.
نوموړي ويلي، د چين او متحده عربي اماراتو د ګډو هڅو په رڼا کې د دواړو هېوادونو اړيکې په ثابت او سوله ييز ډول پرمخ روانې دي، خپلمنځي سياسي باور یې ژور شوی، عملي همکارۍ یې ثابت پرمختګ کوي او کلتوري تبادلې یې هم غوړېدلې دي.
دواړو خواوو د منځني ختيځ او خليج سيمې پر اوسني وضعيت هم خبرې کړې دي. شي جين پينګ د سولې او خبرو اترو په اړه د چين پر اصولي دريځ ټينګار کړی او يو ځل بيا ويلي، چې هېواد به یې په دې اړه رغنده رول ولوبوي. نوموړي د منځني ختيځ د سولې او ثبات لپاره ۴ وړانديزونه کړي دي.
۱. د جنګ ښکېلې خواوې دې د سوله ييز ژوند پر اصل ټينګار وکړي. ۲. ټول هېوادونه دې د ملي حاکميت پر اصل ټينګار ولري. ۳. ښکيلې خواوې دې پر نړيوالو قوانينو او اصولو ټينګار وکړي. ۴. ټول هېواد دې د پراختيا او امنيت پر همغږۍ ټينګار ولري.
شيخ خالد بن محمد په خبرو کې ويلي، چې ابوظبۍ له بېجينګ سره اړيکو ته ډېر اهميت ورکوي او د دواړو هېوادونو د مشرانو ګډې نظريې به ورسره پلې کړي، په بېلا بېلو برخو کې به ورسره همکارۍ ژورې او د اړيکو روښانه راتلونکی به یې جوړ کړي او د دواړو هېوادونو خلکو ته به ډېرې ګټې ورسوي.
نوموړي ويلي، ابوظبۍ په نړيوالو چارو کې د بېجينګ مسووليت او رغنده رول ستايي او په ځانګړې توګه د منځني ختيځ د شخړې د سياسي حل په برخه کې د بېجينګ د مثبتو هڅو ستاینه کوي.
