د چين دولت رئيس شي جين پينګ د اپريل په ۱۴مې نېټې په پلازمېنې بېجينګ کې د خلکو په لوی تلار کې د هسپانيې له لومړی وزير پېدرو سانچيز پېرېز کاستېجون سره ليدلي او د دواړو هېوادونو پر اړيکو يې ورسره خبرې کړې دي.
شي جين پينګ ویلي، که څه هم نړیوال وضعيت په کړکېچن حال کې روان دی، خو د چين او هسپانيې ترمنځ اړيکو ثابت پرمختګ موندلی او لامل يې دا ښودلی، چې دواړو هېوادونو د ګډو ګټو پر بنسټ سمې پرېکړې کړي او په خبره یې، حقیقتونه د دې ښکارندويي کوي، چې ژورې همکارۍ د دواړو هېوادونو د خلکو له ګټو او د پرمختګ له څپې سره يې سمون لري.
نوموړي ويلي، دواړه هېوادونه دې د بهرنيو تګلارو په برخه کې د چین او هسپانيې د اړيکو ودې ته اهميت ورکړي او د ملي حاکميت او د خاورو بشپړتيا د ساتنې په برخه کې دې يو له بل څخه ملاتړ وکړي.
سانچيز ويلي، هېواد يې د يو چين پېژندنې پر اصل ټينګار لري، د چين د لوی هېواد مقام ته په درنه سترګه ګوري او د هسپانيې او چين د ستراتيژيکو ملګرو اړيکو د پرمختګ لپاره هڅې کوي.
نوموړي ويلي، هېواد به یې د سوداګرۍ، پانګونې او نوې انرژۍ په برخو کې له چین سره همکارۍ نورې هم ټينګې او ورسره کلتوري تبادلې به پياوړې کړي.
سانچيز د شي جين پينګ له څلورو نړيوالو وړانديزونو څخه ملاتړ کړی او ويلي يې دي، چې له چيني مشرانو سره به تبادلې او همکارۍ زياتې کړي، څو د نړيوال جعرافيايي سياست، سوداګريز پروټېکشنيزم او د اقليمي بدلون چلينجونه حل او نړيوال قانون او څواړخيزتوب خوندي وساتل شي.
