د چين دولت رئيس شي جين پينګ د اپرېل د ۱۵مې نېټې په سهار د بېجينګ د خلکو په لوی تالار کې د روسيې له بهرنيو چارو وزير سيرګي لاوروف سره لیدلي دي.
شي جين پينګ له سیرګي لاوروف سره په خبرو کې خپل روسي سیال ولاديمير پوتين ته نيکې هيلې وړاندې کړې دي.
سږ کال د چين او روسيې د ستراتيژيکو همکاريزو اړیکو د ټینګېدو ۳۰مه کليزه او د دواړو هېوادونو ترمنځ د ښه ګاونډيتوب او دوستانه همکاريو تړون د لاسليک ۲۵مه کليزه ده.
نوموړي ويلي، دواړو هېوادونو د هراړخيزو ستراتيژيکو همکاريو د پرمختګ لوړه کچه ساتلې او په بېلا بېلو برخو کې ګټورې همکاريزې لاسته راوړنې لري.
شي جين پينګ ويلي، د چين او روسيې ثابتې او ډاډمنې اړيکې د نړۍ په اوسني پېچلي او بې ثباته نړيوال وضعيت کې خاص ارزښت لري او په خبره یې، دواړه خواوې دې د دولتي مشرانو موافقې پلې کړي، ستراتيژيکي تبادلې دې پياوړې او ډيپلوماتيکې همغږۍ دې نږدې کړي، د همغږۍ هر اړخيزو ستراتيژيکو اړيکو ته دې وده ورکړي، د شانګهای همکارۍ سازمان او برېکس په چوکاټونو کې دې نږدې همغږي او همکارۍ زیاتې کړي، څو د یو لا عادلانه او مساوي نړیوال نظم پراختیا ښه وده ومومي.
لاوروف رئيس شي ته د ولسمشر پوتین صادقانه او نیکې هیلې وړاندې کړي او ویلي یې دي، چې د دواړو هیوادونو اړيکو د حکومتي مشرانو تر لارښوونې لاندې لوړ انعطاف ښودلی، د سوداګرۍ، پانګونې او کولتوري تګ راتګ کې یې همکارۍ پياوړې شوي او د ملګرو ملتونو، شانګهای همکارۍ سازمان، برېکس او اېپيک په څېر څو اړخیزو پلیټ فارمونو کې يې همغږي ساتلې ده.
نوموړي ويلي، روسیه به له چین سره يو ځای د دواړو خواوو د مشرانو مهمه اجماع پلې کړي، د لوړې کچې تبادلې به وساتي، عملي همکارۍ به پیاوړې کړي، د خلکو ترمنځ تبادلو ته به وده ورکړي، نړیوال عدالت به وساتي، د دواړو خواوو د اړیکو پراختیا ته به وده ورکړي او د نړيوالې سولې او ثبات لپاره به لا زياتې هڅې وکړي.
په يادې لېدنې کې د چين بهرنيو چارو وزير وانګ یي هم ګډون کړی و.
