د هسپانيې لومړي وزير پېدرو سانچېس د اپريل په ۱۱مې نېټې له چين څخه پنځه ورځنۍ رسمي ليدنه کړې او د دغه هېواد له دولت رئيس شي جين پينګ سره یې د دواړو هېوادونو پر اړيکو خبرې کړې دي.
ښاغلي پېدرو سانچېس د هسپانيې د پخوانيو صدراعظمانو په پرتله چين ته تر ټولو زيات سفرونه کړي او اوسنی یې څلورم سفر و او هم یې د اروپايي هېوادونو په مشرانو کې له چين سره تر ټولو زيات تماسونه ساتلي دي.
د چين او هسپانیې اړوندو ادارو د پېدرو سانچېس د سفر په ترڅ کې د اقتصاد او سوداګرۍ، ښوونې، ټکنالوژۍ، کرنې او خوراکونو په شمول څو برخو کې همکاريز سندونه لاسليک کړي دي.
هسپانوي رسنيو په وروستيو راپورونو کې چين ته د پېدرو سانچېس د سفر او لاسته راوړنو په اړه مالومات ورکړي او اکثرو يې ويلي، چې د نوموړي د سفر لاسته راوړنو د هسپانیې او چين متقابل ستراتيژيک باور پياوړی کړی او د خپلمنځي رغنده ډيالوګ او واقعي همکاريو لوری يې روښانه کړی دی.
د يادونې وړ خبره دا ده، چې د چين او هسپانيې مشرانو د روانې مياشتې په ۱۴مې نېټې په بېجينګ کې د لیدنې په ترڅ کې پر ”ستراتيژيک ثبات“ ټينګار کړی او دا د چين او هسپانيې د اړيکو يوه څرګنده ځانګړتيا بلل کېږي.
د هسپانيې د چيني چارو مشهور کارپوه جوليو ريوس څو ورځې مخکې په يوې ليکنې کې ويلي، چې چين ته د صدراعظم پېدرو سانچېس وروستي سفر له دغه هېواد سره د اړيکو د پرمختګ لپاره د هسپانيې ټينګه او پرېکنده اراده ښکاره کړې ده.
ځيني شنونکي وايي، له چين سره په همکاريو کې د هسپانيې منطقي رويه، په اروپا کې د خلکو پاملرنه راخپله کړې ده.
۲۰۲۵م کال د چين او هسپانيې د هراړخيز ستراتيژيک مشارکت د ټينګېدو له ۲۰مې کليزې سره برابر و. دواړو هېوادونو له تېرو دوو لسیزو راهيسې د نړيوالو حالاتو له سترو بدلونونو سره سره خپل ستراتيژيک ثبات ساتلی او پرمختګ يې موندلی. دلته مهمه تجربه دا ده، چې دواړو هېوادونو تل د ګډو ګټو پر بنست سمې پرېکړې کړې دي.
په نړۍ کې ډېری مهال جيوپوليټيکي شخړې روانې وي، نړيوال اقتصاد کمزوری پرمختګ کوي او د يواړخيزم او پروټېکشنيزم څپې را پورته کېږي.
په دغسې حالاتو کې بیا د چين او هسپانيې ګډې ګټې څه دي؟
د چين دولت رئيس شي جين پينګ يادې پوښتنې ته په ځواب کې ويلي، چې د همکاريو ژورتيا د دواړو هېوادونو د خلکو له ګټو او د زماني پرمختګ له تمايل سره مطابق لري.
اقتصادي او سوداګريزې چارې د چين او هسپانيې د همکارۍ ځلاند ټکی بلل کېږي.
چين له تېرو څو کلونو راهيسې د اروپايي ټولنې په بهر کې د هسپانيې تر ټولو لوی سوداګريز همکار پاتې شوی دی.
په ۲۰۲۵م کال کې د چين او هسپانيې د توکو د صادراتو او وارداتو عمومي ارزښت له ۵۵ ميليارډو امريکايي ډالرو څخه اوښتی، چې دا د ۲۰۲۴م کال په پرتله ۹.۸ سلنه زياتوالی ښيي.
سږ کال د چين د اقتصادي او ټولنيز پرمختګ د ۱۵م پنځه کلن پلان د تطبيق لومړی کال دی او دا به د چين او هسپانيې واقعي همکاريو ته لا پراخه فضا برابره کړي.
د چين او هسپانيې مشرانو د دوه اړخيزو همکاريو د هڅولو نوی لوری روښانه کړی دی.
د چين دولت رئيس شي جين پينګ ويلي، چې دواړه هېوادونه دې له فرصتونو څخه ګټې واخلي، د نوښتي پرمختګ ګډې هڅې دې وکړي، د سوداګرۍ، نوې انرژۍ او ځيرکو اقتصادي چارو په شمول خپلمنځي همکارۍ دې زياتې کړي، په کلتوري، ښوونيزو، علمي او سپورټي چارو کې دې د خپلمنځي تګ راتګ او نظرتبادلو هڅونه وکړي او د هراړخيز ستراتيژيک مشارکت لا زياتې لاسته راوړنې دې ولري او د دواړو هېوادونو خلکو ته دې لا زياتې ګټې ورسوي.
نننۍ نړۍ په ګډوډۍ او بدلونونو کې روانه ده او عدليه او تسلط پکې يو له بل سره ښکېل دي.
چين او هسپانيا له اوږدې مودې راهيسې د نړيوالې سولې او پرمختګ د خونديتوب زياتې موافقې او د همکارۍ خوځنده ځواک لري.
شي جين پينګ له پېدرو سانچېس سره په ليدنې کې چين او هسپانيا اصول لرونکي او عدليه ساتونکي بللي او په خبره یې، دواړه هېوادونه دې په نړۍ کې د ځنګل قانون له بيا تطبيق سره مخالفت وکړي، رښتينی څواړخيزم دې خوندي او د ملګرو ملتونو په محور نړيوال سيسټمونه او د نړيوالو قوانينو پر بنسټ نړيوال نظم دې وساتي.
د هسپانيې صدراعظم پېدرو سانچېس بيا ويلي، چې هېواد يې د چين له څلورو نړيوالو وړانديزونو څخه ملاتړ کوي او له چيني لوري سره به خپلمنځي تماسونه او همغږي زياته کړي، د جيوپوليټيکي سياست، سوداګريز پروټېکشنيزم او اقليمي بدلون په شمول له زياتو نړيوالو ننګونو سره به ګډه مقابله وکړي او نړيوال قوانين او څواړخيزم به په ګډه وساتي.
